Iringa. Umoja wa makanisa ya kitume na kinabii mkoani Iringa umefanya kongamano maalumu la ibada kwa ajili ya kuombea amani ya Taifa huku Jeshi la Polisi kupitia Dawati la Jinsia likisisitiza umuhimu wa kulinda amani hasa kwa ajili ya ustawi wa familia.
Ibada hiyo maalumu imefanyika Novemba 26, 2025 katika Kanisa la Prophetic and Biblical International Ministry (PBMI) lililopo Kata ya Mkimbizi, Manispaa ya Iringa, ikiongozwa na Nabii Bruno Massae na kuhudhuriwa na viongozi wa dini, serikali, wananchi na wachungaji kutoka maeneo mbalimbali mkoani humo.
Katika ibada hiyo, viongozi wa makanisa na waumini walifanya maombi maalumu kwa ajili ya kulibariki Taifa, viongozi wa serikali na vyombo vya ulinzi na usalama, wakisisitiza kuwa jukumu la kulinda amani ni la kila Mtanzania bila kujali imani, nafasi au chama.
Akizungumza katika kongamano hilo kwa niaba ya Kamanda wa Polisi mkoani Iringa, Allan Bukumbi, Mkuu wa Dawati la Jinsia mkoani humo, Elizabeth Swai amesema amani inapovurugika, athari kubwa huwapata watoto, wanawake wajawazito na wajane.
“Amani ikitoweka, watoto na mama wajawazito wanakuwa wahanga wakuu. Watu tumezoea kudhani kupoteza amani ni pale mume anapolala nje au hakuacha hela ya matumizi, lakini siyo vishindo vya risasi au mabomu vitu hivyo hatutaki kuviona Tanzania,” amesema Swai.
Swai amesisitiza kuwa kila raia ana wajibu wa kuchukia vurugu, vita au machafuko, kwa sababu matokeo yake ni kuharibu maisha ya watu wengi na kuvuruga maendeleo ya jamii.
Pia Swai amewapongeza Viongozi wa dini kwa kuchukua jukumu la kuombea amani na kuelimisha jamii.
Mwenyekiti wa Umoja wa Makanisa ya Kitume na Kinabii mkoani Iringa, Nabii Bruno Massae amesema lengo la kongamano hilo ni kuliombea Taifa liendelee kuwa na umoja na upendo, akiwataka Watanzania kuepuka kufuata mikumbo inayoweza kuchochea vurugu.
“Hakuna mahali pengine pazuri pa kuishi zaidi ya Tanzania hivyo tunapaswa kuendelea kulilinda Taifa letu na kudumisha amani,” amesema nabii Massae.
Naye Askofu Samwel Shayo, amesema kongamano hilo linafungua ukurasa mpya wa umoja miongoni mwa viongozi wa dini likiwa ni alama ya mshikamano na amani.
“Kanisa lina nafasi ya kipekee kuhakikisha jamii inabaki tulivu na huu ni wakati wa kufundisha upendo si chuki,” amesema Askofu Shayo
Aidha Mchungaji John Mgina wa Kanisa la Mlima Moto Mafinga naye ametoa wito kwa viongozi wa dini kuendelea kushirikiana na serikali katika kuhubiri amani na maelewano.
Katika hatua nyingine Diwani wa Kata ya Mkimbizi Manispaa ya Iringa, Eliud Mvela amesema kongamano hilo limetoa somo kwa jamii kuwa kulinda amani ni jukumu la pamoja si la viongozi pekee.
Akitoa elimu ya rushwa katika kongamano hilo, Mkuu wa Dawati la Elimu kwa Umma wa Taasisi ya kuzuia na kupambana na rushwa (Takukuru) mkoani Iringa, Beatrice Alfred amekemea vitendo vya rushwa huku akieleza kuwa vitendo hivyo vinaathiri haki na ustawi wa Taifa.
“Rushwa inaharibu maamuzi sahihi na kuzalisha viongozi wasiokuwa waadilifu na madhara yake ni makubwa kuanzia kukosekana kwa maendeleo hadi kupoteza imani kwa serikali,” amesema Beatrice.