Shirika la Posta Tanzania limetunukiwa Cheti cha Usalama cha Kimataifa (S58 & S59) kutoka Umoja wa Posta Duniani (UPU), kufuatia mafanikio katika zoezi la tathmini ya usalama wa mifumo, miundombinu na taratibu za utoaji huduma lililoanza mwezi Oktoba na kukamilika Novemba 7, 2025.
Cheti hicho cha Daraja “A” (tuzo ya dhahabu) kimetolewa rasmi, Novemba 24, 2025 na Mkurugenzi Mkuu wa Umoja wa Posta Duniani (UPU), Masahiko Metoki baada ya timu ya wataalamu wa UPU kufanya ukaguzi wa kina wa wiki moja uliolenga kuhakiki viwango vya usalama wa shirika katika kulinda mizigo, barua na taarifa nyeti zinazopitia katika mnyororo wa huduma za posta.
Katika zoezi hilo la tathmini, Shirika la Posta Tanzania limepata alama 598 kati ya 640, likitimiza kwa ufanisi vigezo vyote vya kupewa cheti hicho cha heshima kinachotolewa kwa taasisi za posta zinazofikia viwango vya juu vya usalama wa kimataifa.
Mkuu wa Kitengo cha Mambo ya Ndani ya Shirika la Posta Tanzania, S.P. Mathias Kipeta akionyesha Cheti cha Usalama cha Kimataifa (S58 & S59) ambacho Shirika la Posta Tanzania limetunukiwa na Umoja wa Posta Duniani (UPU).
Wakipokea cheti hicho, Bi. Caroline Kanuti kwa niaba ya Wizara ya Mawasiliano na Teknolojia ya Habari, pamoja na Mkuu wa Kitengo cha Mambo ya Ndani ya Shirika, S.P. Mathias Kipeta, wameishukuru UPU kwa kutambua juhudi kubwa zinazofanywa na Shirika katika kuimarisha usalama wa huduma zake, na kuahidi kuendeleza maboresho endelevu katika mifumo na miundombinu ya shirika.
Aidha, wataalamu wa UPU waliwasilisha mapendekezo ya kuongeza ufanisi zaidi katika maeneo ya udhibiti wa mizigo, ufuatiliaji wa usafirishaji wa barua na vifurushi, pamoja na uboreshaji wa vituo vya kuchakata mizigo (Office of Exchange) ili kuhakikisha huduma bora, salama na za kisasa.
Wafanyakazi wa Shirika la Posta Tanzania wakisafirisha mizigo kwenda maeneo mbalimbali nchini kwa kutumia pikipiki za kisasa.
Kupitia mafanikio haya, Posta Tanzania sasa imeorodheshwa rasmi miongoni mwa waendeshaji na watoa huduma za posta duniani waliotunukiwa cheti cha usalama na UPU hatua inayoliweka shirika katika nafasi ya juu kimataifa na kuimarisha uaminifu, ushindani na ubora wa huduma kwa wananchi na wateja wa kimataifa.
Mkurugenzi Mkuu wa Umoja wa Posta Duniani (UPU), Masahiko Metoki (katikati) akiwa katika picha ya pamoja na mwakilishi wa Wizara ya Mawasiliano na Teknolojia ya Habari, Bi. Caroline Kanuti (kulia) na Mkuu wa Kitengo cha Mambo ya Ndani ya Shirika la Posta Tanzania, S.P. Mathias Kipeta (kushoto) mara baada ya kuwkabidhi Cheti cha Usalama cha Kimataifa (S58 & S59) kwa Shirika la Posta Tanzania.
Cheti hicho si tukio la kawaida, bali ni uthibitisho wa hatua kubwa ambazo Shirika la Posta limepiga katika kuboresha mifumo yake, kuzuia uhalifu wa kimtandao, kulinda bidhaa za wateja na kuimarisha uaminifu katika sekta ya posta nchini.
Shirika la Posta limeonesha kuwa lina nafasi muhimu katika uchumi wa kisasa na cheti hiki ni uthibitisho thabiti kwamba linaendelea kusonga mbele kwa kasi, ubunifu na uimara.
UPU na umuhimu wa Cheti cha Usalama cha Kimataifa
UPU ni taasisi ya Umoja wa Mataifa inayoandaa kanuni, miongozo na viwango vya huduma za posta duniani. Kupokea cheti kutoka chombo hiki kikubwa ni ishara kwamba huduma za posta Tanzania sasa zimefikia viwango vinavyotambulika kimataifa.
Jengo la Makao makuu ya Shirika la Posta Tanzania lililopo jijini Dar es Salaam.
Hii ni kwa sababu UPU hutoa cheti hiki kwa mashirika yanayofanya mageuzi makubwa, kuwekeza kwenye teknolojia na kuendesha mifumo yenye ufuatiliaji wa kisasa pamoja na sera madhubuti za usalama. Zaidi ya yote, huu ni mwanzo wa safari mpya ya kutoa huduma za kisasa, zenye ubora na usalama wa hali ya juu kwa Watanzania na dunia nzima.