Dar es Salaam. Kauli aliyoitoa kipa wa Azam FC, Aishi Manula kuelekea mechi ya pili Kundi B katika Kombe la Shirikisho Afrika dhidi ya Wydad Athletic itakayochezwa kesho Ijumaa kwenye Uwanja wa New Amaan Complex, Zanzibar, inaonyesha utayari wake wa kukaa golini kuipambania timu hiyo iliyoanza kwa kupoteza ugenini dhidi ya AS Maniema.
Akiwa na kikosi hicho katika maandalizi ya kuikabili Wydad, Manula amesema hivi sasa anapambana kwa nguvu zote kumshawishi Kocha Florent Ibenge ampe nafasi kwani yupo tayari kuitumikia timu hiyo na kutoa mchango wake kuhakikisha wanafikia malengo kimataifa.
Manula ambaye amerejea Azam msimu huu baada ya kumaliza mkataba ndani ya Simba, hajacheza mechi yoyote ya mashindano tangu atue hapo huku kikosi hicho kikiwatumia makipa Zuber Foba na Issa Fofana raia wa Ivory Coast aliyesajiliwa msimu huu akitokea Al Hilal ya Sudan.
Kipa huyo ambaye wikiendi iliyopita Novemba 23, 2025 alikuwa benchi kwa mara ya kwanza wakati Azam ikifungwa mabao 2-0 na AS Maniema katika michuano ya Kombe la Shirikisho Afrika ambapo Foba alidaka, amesema uzoefu na historia pekee havitoshi kumfanya kocha ampe nafasi, bali ni kuonyesha uwezo kwenye uwanja wa mazoezi ili kumshawishi.
“Nimecheza mechi nyingi, toka kule nilipotoka (Simba) mpaka hapa leo (Azam). Na kwa ujumla, uwepo wangu kwenye klabu hii ni kuongeza ile chachu upande wa magolikipa na timu kwa ujumla kuwa na wachezaji wazoefu wa michuano hii ya kimataifa.
“Nadhani hiyo binafsi naona haitoshi kwa kumfanya mwalimu anipe nafasi ya kucheza, lakini itatosha mimi pale nitakapopambana na kumuonyesha kwamba sasa muda umefika wa kupata nafasi ya kucheza.
“Mazoezini ni sehemu pekee ya kumuonyesha mwalimu maana mpira ni mchezo wa wazi na historia pekee haitoshi kumfanya anipe nafasi ya kucheza, bali ni jitihada ambazo anaziona mazoezini na unavyopambana na anapokuona upo tayari.
“Kama nilivyosema nilikuwa napitia changamoto nyingi nilipokuwa, lakini sasa nimeweza kurejea na kuendelea kupambana kumuonyesha mwalimu kwamba kulingana na uzoefu niliokuwa nao lakini ukijumlisha na jitihada ninazozionyesha mazoezini basi itampa yeye sababu ya kuona kama natosha kupewa nafasi ya kucheza,” amesema Manula.
Kabla ya kutua Azam, mara ya mwisho Manula kudaka katika mechi ya mashindano ngazi ya klabu ilikuwa Machi 6, 2024, alipokaa langoni wakati Simba ikifungwa mabao 2-1 na Tanzania Prisons. Tangu hapo, hakuidakia Simba mechi ya mashindano hadi mkataba wake umemalizika mwisho wa msimu wa 2024-2025 na kurejea Azam, baada ya kuondoka hapo mwaka 2017 aliposajiliwa na Simba.
Wakati akipitia wakati mgumu ndani ya klabu, Manula aliitwa kwenye kikosi cha Timu ya Taifa ya Tanzania, Taifa Stars kilichoshiriki Fainali za Mataifa ya Afrika kwa Wachezaji wa Ndani (CHAN) 2024, zilizoandaliwa na Tanzania kwa kushirikiana na Kenya, Uganda kuanzia Agosti 2, 2025 hadi Agosti 30, 2025. Hata hivyo, hakucheza mechi yoyote, Yakoub Suleiman alidaka zote, Taifa Stars ikiishia robo fainali. Kipa mwingine aliyeitwa ni Hussein Masalanga.
Kabla ya Manula kujumuishwa kwenye kikosi cha Taifa Stars kushiriki CHAN 2024, alikaa nje kwa takribani siku 221 kwani mara ya mwisho aliitwa na kucheza mechi ya kuwania kufuzu Fainali za Mataifa ya Afrika (AFCON) 2025 dhidi ya Guinea, Novemba 19, 2024.
Kipa huyo hivi sasa anajifua vikali na kikosi cha Azam kilichopo Zanzibar kikijiandaa na mechi ya pili ya Kombe la Shirikisho Afrika hatua ya makundi itakayochezwa Ijumaa Novemba 28, 2025 dhidi ya Wydad kutoka Morocco kwenye Uwanja wa New Amaan Complex visiwani humo.
Manula amekuwa mzoefu wa michuano ya kimataifa kwani tangu atue Simba msimu wa 2017-2018, akitokea Azam, alikuwa sehemu ya mafanikio ya timu hiyo kucheza hatua ya robo fainali ya CAF mara tano kabla ya msimu wa 2024-2025 kufika hadi fainali ya Kombe la Shirikisho Afrika, licha ya kutotumika katika mechi yoyote msimu huo, lakini alikuwa sehemu ya wachezaji wanaounda kikosi cha Simba.
Katika misimu sita mfululizo ambayo ni 2017-2018, 2018-2019, 2019-2020, 2020-2021, 2021-2022 na 2022-2023, Manula alikuwa kipa namba moja ndani ya Simba, kabla ya ujio wa Ayoub Lakred (2023-2024) na Moussa Camara (2024-2025) kumtibulia.
Manula ambaye anashikilia rekodi ya kuwa kipa aliyeshinda tuzo nyingi za Ligi Kuu Bara ambazo ni tano, alianza kukosa nafasi ya kucheza kikosi cha kwanza cha Simba tangu aliposajiliwa Ayoub Lakred kutokea FAR Rabat ya Morocco. Pia ujio wa Moussa Camara kutoka AC Horoya ya Guinea, ukaongeza balaa zaidi kwa kipa huyo mzawa ambaye hakucheza mechi yoyote ya mashindano tangu Machi 6, 2024.
Hata hivyo, alionja mechi moja tu ya kirafiki ndani ya kikosi cha Simba Agosti 31, 2024 ikiwa ni mechi ya kirafiki dhidi ya Al Hilal iliyomalizika kwa sare ya bao 1-1. Pia mara ya mwisho Manula kukaa benchi kabla ya kuondoka Simba ilikuwa Aprili 13, 2025 wakati timu hiyo ikishinda 2-1 dhidi ya Mbeya City hatua ya robo fainali ya Kombe la FA.
Kabla ya kurejea Azam msimu huu, Manula alionyesha uwezo mkubwa hadi kuitwa ‘Tanzania One’ kwani tangu ajiunge na Simba ametwaa mataji manne mfululizo ya Ligi Kuu Bara msimu wa 2017-2018, 2018-2019, 2019-2020 na 2020-2021.
Uzoefu wake katika michuano ya kimataifa hauna shaka kwani tayari amecheza mashindano ya AFCON mara mbili, mwaka 2019 nchini Misri na 2023 pale Ivory Coast. Pia amecheza CHAN 2020 nchini Cameroon.
Pale Azam, timu hiyo ikiwa tayari imecheza mechi nane za mashindano msimu huu, Manula ameishia kukaa benchi mara moja tu dhidi ya AS Maniema, huku Foba na Fofana wakipokezana kucheza. Foba amecheza nne zote za kimataifa dhidi ya Maniema, KMKM na zile mbili za hatua ya awali Kombe la Shirikisho dhidi ya El Merreikh Bentiu ugenini na nyumbani.
Kwa upande wa Fofana, amedaka tatu za Ligi Kuu Bara dhidi ya Namungo, JKT Tanzania na Mbeya City, pia moja ya hatua ya pili Kombe la Shirikisho Afrika ugenini dhidi ya KMKM.