Mabingwa wa Cyprus, Pafos FC, wametoka nyuma na kulazimisha sare ya 2-2 dhidi ya AS Monaco katika Ligi ya Mabingwa Ulaya, huku beki mkongwe David Luiz akiandika historia kwa kuwa mfungaji wa pili mwenye umri mkubwa zaidi katika michuano hiyo.
Katika mechi hiyo iliyofanyika usiku wa Novemba 26, 2025 kwenye Dimba la Alphamega nchini Cyprus, Monaco ilitangulia kwa bao safi la Takumi Minamino aliyemalizia kwa ustadi pasi ya Maghnes Akliouche.
Anderson Silva alikaribia kuisawazishia Pafos baada ya kugonga mtambaa wa panya kwa shuti la mbali.
David Luiz, mwenye umri wa miaka 38 na siku 218, alisawazisha kwa kichwa maridadi kupitia kona ya Mislav Orsic. Bao hilo lilikuwa la kwanza kwa Luiz katika Ligi ya Mabingwa tangu mwaka 2017 alipokuwa Chelsea.
Kwa bao hilo, Luiz anakuwa mfungaji wa pili mwenye umri mkubwa zaidi katika historia ya Ligi ya Mabingwa Ulaya, akitanguliwa na beki wa FC Porto, Pepe, aliyefunga akiwa na miaka 40 na siku 290.
Hata hivyo, Monaco ilirejea mbele baada ya mshambuliaji Folarin Balogun kufunga kufuatia kosa kubwa la kipa Neofytos Michael wa Pafos aliyempa mpira kwa urahisi.
Pafos iliokoka dakika za lala salama baada ya shuti la Ivan Sunjic kugonga mwamba na mpira kujaa wavuni ukimgonga beki wa Monaco, Mohammed Salisu.
REKODI YA VICTOR DADASON
Viktor Dadason, mshambuliaji chipukizi mwenye umri wa miaka 17, ameendelea kung’ara barani Ulaya baada ya kufunga tena na kuisaidia Copenhagen kupata ushindi wa kwanza katika Ligi ya Mabingwa Ulaya msimu huu dhidi ya Kairat Almaty ya Kazakhstan.
Dadason alifungua ukurasa wa mabao dakika ya 26 katika mechi yake ya kwanza kuanza kwenye Ligi ya Mabingwa iliyochezwa usiku wa Novemba 26, 2025 kunako Dimba la Parken huko Denmark, kabla ya mabao ya kipindi cha pili kutoka kwa Jordan Larsson, mtoto wa gwiji wa Sweden, Henrik Larsson na Robert Silva kuwafanya wenyeji kuwa mbele kwa 3-0.
Mchezaji huyo wa Iceland, ambaye bado hajafunga wala kuanza mechi yoyote kwenye ligi ya nyumbani (Danish Superliga), sasa ana mabao mawili katika mechi tatu za michuano ya Ulaya
Kairat ilipambana kurejea mchezoni dakika kumi za mwisho baada ya mshambuliaji anayejiunga na Chelsea, Dastan Satpaev, kufunga bao la kwanza, kisha Olzhas Baybek kuongeza la pili dakika ya 90. Hata hivyo, mabingwa hao wa Kazakhstan bado hawajapata ushindi wowote na wanabaki nafasi ya pili kutoka mkiani kwenye msimamo wa kundi.
Kairat ilicheza kwa kujilinda na kushambulia kwa kushtukiza, mbinu ambayo ilikaribia kuzaa matunda pale Satpaev alipotoa krosi tamu kwa Edmilson ambaye aliukosa mpira kwa karibu.
Dadason alifunga bao la kwanza kwa kichwa akiwa karibu baada ya mpira wa awali wa Silva kupanguliwa na kipa Temirlan Anarbekov.
Kipa huyo wa Kairat pia alizuia mashuti mawili mfululizo kutoka kwa nahodha Viktor Claesson na Dadason, huku shuti la mbali la Satpaev likipita karibu na lango.
Kairat walinyimwa bao la kusawazisha baada ya Erkin Tapalov kugonga mtambaa wa panya, kabla ya Larsson kuongeza bao la pili kwa mkwaju wa penalti dakika ya 59 kufuatia Damir Kasabulat kuushika mpira.
Robert Silva aliweka mambo kuwa 3-0 dakika ya 73 baada ya shuti lake kubadilishwa mwelekeo na Kasabulat na kumshinda Anarbekov.
Satpaev alifufua matumaini ya Kairat dakika ya 81 kwa kuiba mpira kwa kipa Dominik Kotarski na kufunga, kabla ya Baybek kufunga bao la pili dakika ya 90. Mechi ikaisha 3-2.
Copenhagen sasa inashika nafasi ya 29 kati ya timu 36 ikiwa na pointi nne baada ya mechi tano, huku Kairat ikibaki na pointi moja, nafasi ya pili kutoka mkiani juu ya Ajax.