Uvamizi wa nchi kavu na anga uliofanywa na jeshi la Israel katika mji wa Beit Jinn, kusini mwa Syria, ambapo watu wasiopungua 13, wakiwemo watoto, waliuawa umelaaniwa vikali na Iran pamoja na mataifa kadhaa ya Ghuba ya Uajemi.
Katika taarifa yake usiku wa Ijumaa, msemaji wa Wizara ya Mambo ya Nje ya Iran, Esmaeil Baghaei, alisisitiza haki ya mataifa ya Asia ya Magharibi kulinda mamlaka na mipaka yao dhidi ya uchokozi wa Israel. Alieleza kuwa upinzani wa vijana wa Syria dhidi ya washambuliaji wa Israel ni hatua halali ya kujibu uchokozi huo.
Baghaei pia amekosoa ukiukaji wa sheria za kimataifa unaoendelea kufanywa na utawala wa Kizayuni, akionyesha namna uchokozi huo unavyozidi kuongezeka katika eneo hili. Aidha, amelaani ukimya wa Baraza la Usalama la Umoja wa Mataifa mbele ya ukiukaji wa Israel dhidi ya mamlaka na mipaka ya nchi za eneo hilo, ikiwemo Syria na Lebanon. Ameonya kuwa hali ya sasa inaweza kuathiri pakubwa amani na utulivu wa dunia, akihimiza jamii ya kimataifa kuchukua hatua.
Awali, Wizara ya Mambo ya Nje ya Syria ililaani shambulio hilo katika vitongoji vya Damascus, ikilitaja kama mauaji ya kikatili. Wizara hiyo ilisema kuwa vikosi vya Israel vilifanya mashambulizi ya kiholela baada ya kushindwa kusonga mbele katika hujuma ya nchi kavu.
Qatar imetoa taarifa na kusema hujuma hiyo ya Israel “inaongeza mvutano na kudhoofisha juhudi za kufanikisha usalama na utulivu katika eneo.”
Saudi Arabia nayo imesema kuwa “inakemea na kulaani shambulio la wazi” la Israel kwa lengo la “kuvuruga usalama na utulivu wa Syria na wananchi wake.”
Kuwait pia imelaani mashambulizi hayo, ikisema: “Mashambulizi haya ya kihalifu ni mwendelezo wa mbinu za Israel za kuvuruga usalama na utulivu wa eneo, na kudhoofisha juhudi za kikanda na kimataifa za kupunguza mvutano.”
Kwa mujibu wa taarifa, watu wasiopungua 13 Syria, ikiwemo familia moja ya watu watano, waliuawa na wengine zaidi ya ishirini kujeruhiwa katika mashambulizi ya Israel dhidi ya eneo la Beit Jinn, nje ya mkuu wa Syria, Damascus. Mashambulizi hayo yalifanywa usiku wa Alhamisi kwa kutumia helikopta na ndege zisizo na rubani, baada ya vikosi vya Israel kuingia mjini na kukabiliwa na wakazi wa eneo hilo, hali iliyosababisha mapigano na milio ya risasi.