Rais Donald Trump wa Marekani ametia saini amri ya utendaji dhidi ya Ikhwanul Muslimin (Muslim Brotherhood), na kuyaweka baadhi ya matawi ya kundi hilo la Kiislamu katika orodha ya “mashirika ya kigeni ya kigaidi”.
Kwa kutia saini amri hiyo ya utendaji, Trump amewaagiza mawaziri wake wa mambo ya nje na fedha kuripoti iwapo baadhi ya matawi ya Ikhwanul Muslimin, ni mashirika ya kigeni ya kigaidi na pia magaidi maalumu wa kimataifa.
Uamuzi huo wa Trump umeibua hisia nyingi za kimataifa na kwa hakika, unaonyesha juhudi za Marekani za kupunguza ushawishi wa Ikhwanul Muslimin katika nchi za Magharibi mwa Asia.
Muslim Brotherhood ambayo ilianzishwa nchini Misri mnamo 1928, ilipanua ushawishi wake haraka katika nchi za Kiarabu. Baada ya kuondolewa madarakani Hosni Mubarak nchini Misri, kundi hilo lilifanikiwa kumfikisha madarakani Mohamed Morsi, lakini baada ya mapinduzi ya Abdel Fattah al-Sisi mwaka 2013, lilitambuliwa kama tishio kubwa kwa usalama wa ndani na utulivu wa kikanda. Agizo hilo la Trump linalenga hasa matawi ya kundi hilo huko Lebanon, Misri na Jordan, jambo ambalo linaweza kuathiri uhusiano wa Marekani na nchi hizo. Kinyume chake, nchi kama Saudi Arabia na Umoja wa Falme za Karabu (UAE), ambazo zinaiona Muslim Brotherhood kama tishio kwa usalama wao, huenda zikaunga mkono hatua hii.
Miongoni mwa taathira za amri hiyo ya Trump ni kushadidi mashinikizo ya kimataifa dhidi ya makundi ya Muqawama kama vile Hizbullah ya Lebanon na Hamas huko Palestina, ambayo yamekuwa yakiungwa mkono na Ikhwanul Muslimin katika kukabiliana na adui Mzayuni. Uamuzi huu pia unaweza kutatiza mwingiliano wa makundi haya na nchi nyingine katika kanda na wachezaji muhimu wa kimataifa. Pia, makundi ambayo yanapata msaada wa kifedha na silaha kutoka kwa baadhi ya nchi za Kiarabu yanaweza kuwa chini ya mashinikizo makubwa, na uungwaji mkono wa kimataifa kwao unaweza kupungua.
Taathira za agizo la Trump haziishii katika nchi kama Lebanon na Misri pekee. Katika ngazi ya kikanda, nchi kama Uturuki, ambayo inajulikana kama muungaji mkono wa Muslim Brotherhood, zinaweza kuchukua hatua za kidiplomasia na kiusalama za kukabiliana na uamuzi huo. Uturuki imekuwa ikiihami harakati ya Brotherhood na inawapa hifadhi wanachama wake wengi. Kwa hiyo, shinikizo lolote la Marekani kwa Uturuki linaloitaka ichukue msimamo dhidi ya Ikhwanul Muslimin linaweza kuzidisha mivutano kati ya nchi hizo mbili.
Pia, uamuzi wa Donald Trump unaweza kuwa na athari kubwa kwa uhusiano wa Marekani na nchi nyingine, kama vile Russia na Uchina, ambazo zimeyaunga mkono makundi ya Kiislamu katika baadhi ya migogoro na huenda zikaiona amri hiyo kama tishio kwa usalama wao wa kikanda.
Kwa upande wa Qatar, ambayo kijadi imekuwa ikiiunga mkono Muslim Brotherhood, uamuzi huo unaweza kuwa na taathira kubwa. Qatar ambayo katika miaka ya hivi karibuni imekuwa ikiiunga mkono Ikhwanul Muslimin, inaweza kukabiliwa na mashinikizo ya kisiasa na kidiplomasia kutoka kwa Marekani na washirika wake. Uhusiano wa Qatar na baadhi ya nchi za Kiarabu, kama Misri na Saudi Arabia uliingia dosari na mivutano, kuhusu suala la Ikhwanul Muslimin. Kwa hiyo, kuliweka kundi hilo katika orodha ya magaidi kunaweza kuiweka Qatar katika wakati mgumu.
Tunaweza kusema kuwa, Hatimaye, amri ya Trump sio tu inawakilisha shinikizo zaidi kwa Ikhwanul Muslimin bali pia ni hatua ya kimkakati ya kubadilishwa sera za Marekani katika nchi za Asia Magharibi na kukabiliana na kile inachokiona kuwa vitisho vya usalama. Dikrii hiyo inaweza kutayarisha uwanja wa mabadiliko makubwa katika uhusiano wa kikanda na pia mabadiliko makubwa katika sera za nchi za eneo la Magharibi mwa Asia.
Kwa ujumla ni kwamba, agizo hilo la utendaji sio hatua ya kukabiliana na ugaidi, lakini ni sehemu ya mkakati mpana zaidi wa kubadilisha mlingano wa nguvu katika eneo hilo. Uamuzi huo sio tu kwamba utazidisha mashinikizo ya kisiasa na kiusalama kwa matawi mbalimbali ya Ikhwanul Muslimin na makundi washirika, bali pia unaweza kubadilisha mishikamano wa miungano na makabiliano katika ngazi za kieneo na kimataifa.
Siku zijazo zitaonyesha iwapo mashinikizo haya yatapelekea kupunguza ushawishi wa harakati hizo au kinyume chake, itafungua njia ya matukio mapya na yasiyotabirika.