Bwana Yesu asifiwe. Naitwa Mwalimu George Mbwambo kutoka Usharika wa KKKT Buza, jijini Dar es Salaam. Karibu katika mahubiri ya siku ya leo yenye kichwa cha somo kinachosema ‘Hofu ya Mungu inavyozaa huruma ya kweli kwa watu’.
Mara nyingi tunapozungumza kuhusu kumcha Mungu, watu hufikiri juu ya kuogopa adhabu, lakini Biblia inaonyesha wazi kwamba kumcha Mungu si tu kuogopa, bali ni kuheshimu, kutii, na kufuata tabia yake.
Ni vyema kuelewa kwamba hakuna tabia inayomwakilisha Mungu zaidi ya huruma. Ndiyo maana mahubiri haya yanatukumbusha kwamba hofu ya Mungu ya kweli lazima izae matendo ya huruma, upendo na wema kwa watu wa Mungu na kwa ulimwengu.
Maana ya kumcha Mungu
Kumcha Mungu ni msingi wa hekima (Mithali 9:10). Kumcha Mungu siyo hofu ya kukimbia, bali ni moyo unaomtambua Mungu kama Mtakatifu, Mkuu, mwenye mamlaka na anayestahili utiifu wetu wote. Ni hali ya kuwa na unyenyekevu mbele zake, kutii Neno lake, na kuishi tukijua kwamba macho ya Bwana yako juu ya njia za wanadamu.
Biblia inasema, “Kumcha Bwana ni kuchukia maovu” (Mithali 8:13). Hivyo kumcha Mungu kunatuongoza kuishi maisha safi na ya haki. Lakini zaidi ya hapo, kumcha Mungu kunabadilisha mioyo yetu ili iendane na moyo wake moyo uliojaa huruma, rehema, na upendo.
Mtu ambaye kweli anamcha Mungu hawezi kukosa huruma kwa watu. Kwa nini? Kwa sababu kumcha Mungu kunaleta ufunuo wa tabia ya Mungu na Mungu ni mwenye huruma.
Biblia inasema, “Bwana ni mwingi wa rehema na neema, haoni hasira upesi” (Zaburi 103:8). Unapokaa karibu na Mungu, tabia yake lazima ionekane ndani yako. Kumcha Mungu kunavunja ukatili wa moyo, ubinafsi na kujipenda kupita kiasi.
Katika Mathayo 5:7 Yesu alisema, “Heri wenye rehema; kwa maana hao watapata rehema.” Hii inaonyesha wazi kwamba mtu anayemcha Mungu kwa kweli hawezi kukosa kutenda huruma.
Ikiwa tunamcha Mungu, tutawaangalia wenzetu kwa macho ya upendo maskini, wagonjwa, waliokata tamaa na hata waliotuudhi. Kumcha Mungu kunatuongoza kuchukua hatua kwa wenzetu, si kwa sababu wanalistahili, bali kwa sababu Mungu ameturehemu sisi kwanza.
Mifano ya watu waliomcha Mungu na kuonyesha huruma
Yusufu katika Mwanzo 50:19–21). Licha ya kaka zake kumtendea mabaya, Yosefu hakuwalipiza kisasi. Aliwaambia, “Mlikusudia kunitendea mabaya, lakini Mungualikusudia mema.” Huu ni moyo wa mtu anayemcha Mungu huruma mbele ya uovu.
Musa – Kutoka 32:11–14. Waisraeli walimsaliti Mungu, lakini Musa aliwaombea huruma. Licha ya uchungu aliosikia, aliomba Mungu asiharibu watu wake. Hii ni huruma iliyotokana na kumjua Mungu wa rehema.
Daudi kwa Sauli – 1 Samweli 24. Daudi alipata nafasi ya kumuua Sauli, lakini alikataa akisema, “Siwezi kuinua mkono wangu juu ya mpakwa mafuta wa Bwana.” Hofu ya Mungu ilizaa huruma hata kwa adui.
Yesu Kristo ambaye ni mfano mkuu.Katika Luka 23:34 Yesu aliomba msamaha kwa wale waliomsulubisha: “Baba, uwasamehe, kwa kuwa hawajui watendalo.” Hakufuata hisia za mwili. Huu ndio mfano wa juu wa hofu ya Mungu inayozalisha huruma.
Hofu ya Mungu pasipo huruma ni unafiki
Biblia inaonya kwamba kumcha Mungu kwa maneno tu bila matendo ya huruma ni unafiki.
Yesu aliwakemea Mafarisayo: “Mmetupa mbali mambo ya muhimu ya sheria: haki, rehema na imani” (Mathayo 23:23).
Mafarisayo walikuwa na sura ya utauwa, walifunga, walitoa zaka, walionekana watakatifu lakini hawakuwa na huruma. Hiyo si hofu ya Mungu ya kweli, bali ni dini ya nje isiyo na nguvu ya Mungu ndani yake.
Hivyo mtu anayesema anamcha Mungu lakini hapendi watu, hawaangalii walio na uhitaji, hawasamehi walio wakosea, au hawatendei wengine kwa wema huyo hana hofu ya kweli ya Mungu.
Matokeo ya hofu ya Mungu iliyojaa huruma
Kumcha Mungu kwa njia inayozalisha huruma hubeba matokeo makubwa kwa jamii, kanisa na mtu binafsi:
Hubeba amani.Huruma huondoa chuki, visasi, na migawanyiko. Watu wenye huruma huleta amani katika familia, makazi, na kanisani.
Huleta mabadiliko ya kijamii.Watu wenye hofu ya Mungu hubeba mzigo wa kuwasaidia maskini, wagonjwa, wenye njaa na walioteseka. Hivyo jamii hubadilika.
Huleta baraka za Mungu. Biblia inasema, “Apandaye rehema atavuna rehema” (Mithali 11:17). Mungu huwabariki wanaotenda huruma.
Huwavuta watu kwa Kristo.Watu hawafiki kwa Kristo kwa maneno pekee, bali kwa vitendo vya huruma. Huruma inaonyesha tabia ya Kristo.
Huandaa mtu kwa uzima wa milele.Yesu alisema katika Mathayo 25 kwamba wale walioonyesha huruma waliowapa wenye njaa chakula, walio wageni, wagonjwa, wafungwa hao ndio watakaoambiwa, “Njoo uingie katika furaha ya Bwana wako.”
Mtu wa Mungu amua leo kubeba roho wa Mungu ili uwe nahofu ya Mungu ya kweli. Huruma kwa maskini, wagonjwa, walioteseka, na hata wale waliotukosea. Leo Bwana anatuita tuondake kwenye maneno matupu, bali matendo ya upendo.
Tukimcha Mungu kwa kweli, mioyo yetu itafanana na moyo wa Yesu moyo wa upendo, rehema, na huruma. Bwana akubariki na akusaidie kuishi hofu ya Mungu inayozalisha huruma ya kweli kwa watu. Amina.
Mwalimu George Mbwambo anapatikana Usharika KKKT Buza, kwa ushauri na maombezi simu +255 788 873 267