Kuwa na mtoto au watoto au wazazi wa kambo ni jambo la kawaida katika jamii ya binadamu bila kujali jiografia, rangi, hata uwezo kiuchumi au vyovyote.
Watoto na wazazi wa kambo ni sehemu ya kawaida katika maisha na ndoa za binadamu. Hivyo, leo, tutadurusu hali hii ambayo haiepukiki katika maisha ya baadhi ya watu kutokana na sababu mbalimbali japo si kwa wote.
Katika kudurusu visa mbalimbali vihusianavyo na watoto, wazazi wa kambo, na malezi yao, tumegundua kuwa kulea watoto hawa ni changamoto kubwa sana kwa familia hasa kwa kinamama.
Hii ni kutokana na kujengeka imani na hata mazingira hatarishi na potofu kuwa mama wa kambo si mama wakati ni mama.
Mara nyingi, ufanisi au kutofanikiwa katika malezi ya watoto wa kambo hutegemea mambo makuu matano yaani, uhusiano baina ya wazazi, watoto wenyewe, wazazi wao, wazazi wao wa kambo, na uimara au udhaifu wa ndoa husika.
Uzoefu wetu utokanao na uchunguzi na kusikia visa mbalimbali vihusianavyo na watoto na wazazi wa kambo, vimeonyesha baadhi ya mambo ambayo ni muhimu kuyadurusu:
Mosi, mafanikio au maanguko katika malezi ya watoto wa kambo hutegemea athari za tabia na uelewa wao binafsi kama watoto na binadamu na wazazi wao wa pande mbili yaani, wazazi wao wa kimwili na wazazi wa kambo.
Hivyo, kwanza, tabia za mama au baba wa kambo kuelekea kwa watoto wao wa kambo, zina mchango mkubwa katika mafanikio au maanguko katika malezi ya watoto husika.
Pili, imani potofu kuwa mama wa kambo si mama wakati ni mama. Watoto wanaolishwa kasumba na tabia hii si rahisi kuwaamini na kuwapenda wazazi wao wa kambo hasa inapotokea uhusiano wa wazazi wao ukayumba au kutokuwa na afya.
Isitoshe, kama tulivyogusia hapo juu, si sahihi au ukweli kuamini kuwa mama wa kambo wote wana tabia ya kuwakataa, kuwanyanyapaa, au kuwatesa watoto wao wa kambo. Mbona wapo wanaowapenda kama watoto wao wa kuzaa japo si wengi ikilinganishwa na wanaowatenda ndivyo sivyo.
Tatu hakuna kitu kinaharibu au kufanya maisha ya watoto wa kambo kuwa magumu kama imani potofu kuwa baba au mama wa kambo si baba wala mama. Rais wa zamani wa Marekani Billy Clinton, bilionea mkubwa wa kampuni ya Amazon, Jeff Bizos, mwanzilishi kampuni ya Apple, Steve Jobs na wengine wengi walilelewa na baba wa kambo hadi wakachukua majina yao na kuyaacha ya baba zao wa kimwili. Hawa kinababa nao utawaweka kundi gani?
Nne, kutokana na mfumo dume kutawala dunia, uwezekano wa mama wa kambo kuwa mbaya ni mkubwa kuliko baba wa kambo. Hii inaweza kusababishwa na mambo kadhaa kubwa likiwamo kuingiliwa malezi na wazazi wa kimwili. Mfano, unakuta mama kaachika au kazaa na mtu ambaye hakupenda kumuoa lakini bado anaamini kuwa aliyemuoa ndiye aliyemsababishia kutoolewa.
Mama kama huyu asipokuwa makini, anaweza kumyumbisha mwanawe akidhani anamkomoa baba yake wakati ukweli ni kwamba anayekomolewa ni mtoto.
Tano, tatizo jingine laweza kusababishwa na uhusiano baina ya wazazi wawili wa kimwili. Mfano, mtu anapozaa na mwingine halafu akatoa fursa kwa yule mzazi kuingilia ndoa yake, kutakuwa na tatizo na tatizo lenyewe litaanza na ushauri wa mama anaompa mwana au wanawe.
Hili tatizo ndilo sugu na changamoto kwa mama wa kambo wengi. Hakuna mtu mwenye akili atakubali ndoa yake iingiliwe tena na mtu aliyeshindwa kuolewa kabla yake. Hivyo, tunashauri wazazi wa kimwili ambao watoto wao wanalelewa na baba au mama wa kambo, kutoa fursa kwa wahusika kuwalea watoto wao bila kuwaingilia, kuwatumia kukomoana na mengine kama hayo.
Tumalizie. Unapokuwa na mtoto akalelewa na mzazi wa kambo ni jukumu lako kujenga mazingira na uhusiano wako ili usiharibu maisha ya mtoto wako.
Unapaswa kutoa fursa kwa mzazi wa kambo kumlea mtoto bila kujenga imani potofu na mazingira hatarishi, kwani, mwishowe, atakayeumia au kunufaika ni mtoto wako na hata wewe mwenyewe.