Unguja. Waziri wa Nchi, Ofisi ya Makamu wa Pili wa Rais Zanzibar, Hamza Hassan Juma, amesema hakuna askari wa vikosi vya idara maalumu aliyesafiri kutoka Zanzibar kwenda Tanzania Bara kushiriki katika matukio yaliyotokea Oktoba 29, 2025.
Aidha, amewasihi vijana kuacha kuichokoza Serikali kwani hiyo ni dola na haitamvumilia mtu mwenye nia ya kuichafua nchi kwa kuwalinda wananchi wake.
Matukio anayozungumzia Waziri Juma ni yaliyotokea wakati na baada ya uchaguzi mkuu uliofanyika Oktoba 29, 2025, ya maandamano yaliyozua vurugu katika mikoa mbalimbali ikiwemo ya Dar es Salaam, Mwanza, Mbeya, Songwe, Arusha, Dodoma, Ruvuma na Mara.
Vurugu hizo zilisababisha vifo, majeruhi, uharibifu wa mali za wananchi, miundombinu ikiwemo ya mabasi yaendayo haraka Dar es Salaam, kuchomwa moto vituo vya mafuta, ofisi za Serikali za mitaa na vituo vya polisi.
Mamia ya waandamanaji walitiwa nguvuni na kufunguliwa kesi za uhaini. Hata hivyo, Rais Samia Suluhu Hassan alitoa msamaha kwa wale waliofuta mkumbo na tayari Mkurugenzi wa Mashtaka (DPP) ameanza kuwafutia kesi hizo.
Katika mitandao ya kijamii, kumekuwa na madai kwamba baadhi ya askari walioshiriki kuzuia vurugu hizo ni kutoka Zanzibar.
Hata hivyo, leo Jumapili, Novemba 30, 2025, ikiwa ni takribani mwezi mmoja umepita, Waziri Juma amejitokeza mbele ya waandishi wa habari ofisini kwake Vuga, Mjini Unguja, akisema wapo baadhi ya watu wasioitakia mema nchi wanaoendelea kutumia mitandao ya kijamii kueneza propaganda hasi za kuvihusisha vikosi vya Idara Maalumu Zanzibar katika matukio hayo.
Waziri wa Nchi Ofisi ya Makamu wa Pili wa Rais Zanzibar, Hamza Hassan Juma akizungumza na waandishi wa habari Ofisini kwake iliyopo Vuga, Mjini Unguja. Picha na Zuleikha Fatawi
Amesema propaganda hizo zinahamasisha chuki miongoni mwa Watanzania kwa kutaka kuanzisha mgawanyiko na ubaguzi wa kikanda, jambo ambalo halina ukweli.
“Uchochezi huo hauna nia njema kwa nchi yetu na tusikubali wala kuuamini upotoshaji huo kwa sababu hakuna askari yeyote wa kikosi aliyevuka maji kufanya matukio hayo,” amesema Waziri Juma.
Pia, amesema Serikali inapinga vitendo vyote vyenye lengo la kupotosha misingi ya umoja, amani na mwingiliano wa kindugu uliojengwa kwa hiari na waasisi wa taifa hilo.
Amesema Tanzania inaendelea kuzilinda tunu za taifa, hususan umoja, amani na mshikamano uliosisiwa na Rais wa kwanza wa Tanzania, Mwalimu Julius Nyerere, na Rais wa Zanzibar, Sheikh Abeid Aman Karume.
Amesema zipo nchi zilizoingia katika machafuko kufuatia baadhi ya watu wake kupandikiza chuki kwa kutumia propaganda za kuwagawa wananchi wake kwa misingi ya ukanda, ukabila, dini na itikadi za kisiasa.
Hivyo, ametoa wito kwa waandishi wa habari na jamii kutokubali kutumiwa vibaya na maadui kwa kueneza taarifa za upotoshaji zinazoweza kulisambaratisha taifa.
Waziri huyo amewataka viongozi wa dini, mila na kisiasa kukemea suala hilo na kuchukua juhudi za kuwahamasisha wananchi kuendeleza mshikamano na undugu wa damu kati ya Zanzibar na Tanzania Bara, kwa kudumisha amani na utulivu nchini.
Pia, amewasihi vijana kujiepusha na vitendo vinavyoweza kuhatarisha amani na usalama wa nchi kwani viongozi wa Serikali wamejipanga kusikiliza na kutatua changamoto za vijana.