Kamati ya Umoja wa Mataifa dhidi ya Mateso (CAT) imeulaani utawala wa Israel kwa kutekeleza sera ya “mateso ya kupangwa” dhidi ya Wapalestina.
Kamati hiyo imesema katika ripoti yake iliyochapishwa juzi Ijumaa kwamba utawala ghasibu wa Israel unatekeleza sera ya makusudi ya “mateso yaliyopangwa, mateso makubwa na ya kikatili dhidi ya mateka wa Kipalestina, hasa tangu tarehe 7 Oktoba 2023, wakati Israel ilipoanzisha vita na mauaji ya kimbari dhidi ya Wapalestina wa Ukanda wa Gaza.
Kamati hiyo imesema kuwa ina “wasiwasi mkubwa’ kuhusu vipigo vikali vya mara kwa mara, kushambuliwa na mbwa, kujeruhiwa au kuuawa kwa shoki ya umeme, kudhalilishwa kingono na mateso mengine wanayofanyiwa Wapalestina.
Ripoti ya Kamati ya Umoja wa Mataifa Dhidi ya Mateso (CAT) imeeleza kuwa raia wa Palestina wanaoshikiliwa katika jela za Israel wanadunishwa na kudhalilishwa kwa “kufanywa kama wanyama”, kukojolewa, kunyimwa huduma ya matibabu kwa makusudi na kuwekewa vizuizi kupita kiasi; na katika matukio mengine Wapalestina hao wamefikia kiwango cha kukatwa viungo vyao kwa sababu ya kukosa matibabu.
Ripoti ya makundi ya kutetea haki za binadamu ya Palestina na ya Kimataifa inaonyesha kuwa zaidi ya Wapalestina 10,000, wakiwemo wanawake na watoto, wamefungwa katika jela za Israel.