Jeshi la Walinzi wa Mapinduzi ya Kiislamu (IRGC) limesema kuwa liliangusha droni ya kivita ya Marekani aina ya MQ 9 karibu na Mlango Bahari wa Hormuz, wakati mvutano wa kijeshi ukiongezeka kufuatia vitendo vya kijeshi vya Marekani na ukiukaji wa mara kwa mara wa makubaliano ya kusitisha mapigano.
Katika taarifa iliyotolewa Jumatano, IRGC ilisema kuwa droni hiyo aina ya General Atomics MQ‑9 Reaper iliangushwa katika anga ya mji wa Jam katika mkoa wa Bushehr, wakati wa mapambano ya kijeshi karibu na Mlango huo muhimu wa kimkakati.
Katika taarifa hiyo, IRGC ilisema: “Wakati wa makabiliano ya angani yanayoendelea katika Mlango wa Hormuz, droni ya MQ‑9 iliyokusudia kukaribia na kuingilia eneo la operesheni kupitia anga ya kaskazini mwa Ghuba ya Uajemi ililengwa na kuharibiwa kwa makombora ya wapiganaji shujaa wa vikosi vya kisasa vya ulinzi wa anga vya IRGC, katika anga ya mji wa Jam, Mkoa wa Bushehr.”
Kuangushwa kwa droni hiyo kumekuja baada ya Iran kutoa jibu kali dhidi ya shambulizi la Marekani lililolenga mali za Iran karibu na Mlango wa Hormuz, kufuatia ajali ya helikopta ya kijeshi ya Marekani aina ya Apache.
Vyombo vya habari vya Kiarabu viliripoti milipuko mipya nchini Bahrain, na vyanzo vya eneo hilo vikitaja kuwa milipuko hadi 16 ilisikika baada ya mashambulizi ya Iran.
Mapema Jumatano, Kikosi cha Tano cha Jeshi la Wanamaji la Marekani huko Bahrain kilishambuliwa kwa makombora na droni za Iran. Aidha, Iran ilitekeleza mashambulizi ya makombora na droni dhidi ya vituo vya kijeshi vya Marekani nchini Jordan na Kuwait katika saa za alfajiri za Jumatano.
Tathmini za awali za picha za setilaiti na taarifa za kijasusi kutoka uwanjani zinaonyesha mafanikio makubwa katika operesheni iliyofanywa alfajiri Jumatano.
Kwa mujibu wa takwimu za awali zilizokusanywa, asilimia 70 ya malengo yaliyopangwa yalipigwa kwa mafanikio.
Wakati huo huo, picha za setilaiti pia zimeonyesha uharibifu katika Kituo cha Kijeshi cha Ramat David cha utawala wa Israel kufuatia shambulizi la kombora la masafa marefu la Iran lililofanywa kulipiza kisasi mashambulizi ya Israel kusini mwa Beirut.
IRGC ilithibitisha kulenga kituo cha Ramat David, kituo muhimu kinachotumiwa na jeshi la Israel kuratibu mashambulizi dhidi ya mji mkuu wa Lebanon, kwa makombora ya Kheibar Shekan na Qadr.
Shambulizi hilo la Iran lilikuwa mara ya kwanza kwa kombora la moja kwa moja kulenga eneo linalokaliwa na Israel tangu makubaliano ya kusitisha mapigano ya Aprili, kufuatia ongezeko la mashambulizi ya angani ya Israel nchini Lebanon ambayo, kwa mujibu wa mamlaka za afya za Lebanon, yamesababisha vifo vya raia kadhaa katika siku za karibuni.