Arusha. Waziri wa Habari, Utamaduni, Sanaa na Michezo, Profesa Palamagamba Kabudi amesema endapo waasisi wa Taifa hili wangeandika tawasifu zao wenyewe ikiwemo mitikisiko na changamoto walizopitia, ingesaidia kujua mapito ambayo Taifa liliwahi kupitia na ingekuwa ni dira ya sasa hasa katika vipindi hivi vya mitikisiko na namna ya kuiendea.
Profesa Kabudi ameyasema hayo jana usiku jijini Arusha, wakati akizindua kitabu cha Tawasifu ya aliyewahi kuwa mkuu wa mikoa mbalimbali nchini, Balozi Daniel Ole Njolai.
Kitabu hicho chenye kurasa 146, kinaelezea maisha yake ya utumishi wa umma pamoja na historia yake binafsi akitokea katika familia ya wafugaji wa jamii ya Kimasai na namna alivyoweza kupata elimu katika mazingira magumu, kipindi ambacho mtoto wa Kimasai kwenda shule ilikuwa ni kwa kulazimishwa na Serikali.
“Baba wa Taifa, Mwalimu Julius Kambarage Nyerere alituachia ombwe kubwa sana kwa yeye mwenyewe kutoandika tawasifu yake, Ni kweli watu wengi wameandika tawasifu ya Mwalimu Nyerere na mimi sibezi kazi hizo, natamani angeandika yeye mwenyewe.
“Angetusaidia sana kufanya tujue mapito ya Taifa hili maana tawasifu yake ingekuwa kwetu ni dira katika safari ya Taifa letu na hasa katika vipindi vya mitikisiko. Ingekuwa ni dira kwa Taifa na hasa katika vipindi vya mitikisiko kwa sababu yeye mwenyewe alipata mitikisiko, angekuwa ametuachia wosia, mitikisiko ya namna hii ikitokea na njia za kuiendea.
Amesema. “Nasema haya kwa sababu wengi wanadhani Mwalimu aliongoza bila mitikisiko, mitikisiko ilikuwepo na ipo iliyotikisa mpaka ukijiuliza unashangaa, angetusaidia kupita katika tufani kwa sababu wakati mwingine tunapita katika tufani.
“Ndio maana napenda kusikiliza hotuba za Mwalimu, ni utabiri wa mambo mbalimbali katika jamii, sijui kama yeye mwenyewe alifahamu suala hilo, ukisikiliza utaona utabiri wake kwa nyakati hizi huenda zikadumu hata nyakati zijazo,” amesema.
Aidha, amewataka Watanzania kujenga utamaduni wa kuandika tawasifu zao wenyewe ili baadaye vizazi vinavyokuja viweze kujifunza kutokana na kumbukumbu walizoachiwa na namna ya kukabiliana na jambo.
“Mliopo hapa andikeni, hakuna maisha au uzoefu usiokuwa na faida kwa vizazi vijavyo, niwaombe sisi wote ambao tumo humu tuandike ili tuwaachie urithi kama alivyofanya ndugu yetu Balozi Ole Njolai,” amesema Profesa Kabudi na kuongeza;.
“Tanzania ya leo tawasifu ni mwanga wa vijana wa leo na kesho kwa kuwa ni kumbukumbu itakayoishi daima, kitabu kitasomwa, kitathaminiwa na yale yaliyomo yakitekelezwa.”
Aidha, Profesa Kabudi amesema kupitia tawasifu hizo ndio tunapata maarifa ya tatuzi za changamoto, mapito ya mataifa, kujua changamoto walizopitia, lakini walichukua hatua gani.
“Kwa sababu pengine mnaweza kuwa na changamoto au tatizo mkadhani mnazama, lakini mkisoma wengine mnaona ni jinsi gani walifanya,” amesema Profesa Kabudi.
Aidha, amepongeza Balozi Ole Njolai kwa uthubutu wake wa kurithisha wengine maarifa, uzoefu na ujuzi aliokuwa nao.
“Kwa sababu ni maisha uliyoyaisha unaweza kuona mambo uliyoandika katika kitabu hiki ni mambo ya kawaida kabisa, lakini nikuhakikishie kabisa kwa vizazi vya sasa, vijavyo umewaachia hazina kubwa sana,” amesema Profesa Kabudi
Amesema; “Mtakaokuja kuwa wakuu wa mikoa miaka 20 ijayo, mabalozi miaka 30 ijayo, wana mahali pa rejea, naamini atakayekuja kuwa mkuu wa mkoa wa Arusha kwa miaka 20 ijayo, au Mwanza miaka 20 ijayo, Rukwa miaka 20 ijayo kitabu chako kitakuwa rejea nzuri sana.”
Pamoja na mambo mengine, Profesa Kabudi amesema vitabu hivyo vitanunuliwa katika maktaba ya Taifa na kusambazwa maeneo mengine ili visomwe na watu wengi.
Katika kitabu hicho, Balozi Daniel Ole Njolai, ameeleza namna alivyotumia miaka mitatu kuandika kitabu (tawasifu) akielezea maisha yake ya utumishi wa umma pamoja na historia yake binafsi akitokea katika familia ya wafugaji wa jamii ya Kimasai.
Aidha, katika kitabu hicho chenye kurasa 146, kinaeleza namna alivyoweza kupata elimu katika mazingira magumu, kipindi ambacho mtoto wa Kimasai kwenda shule ilikuwa ni kwa kulazimishwa na Serikali.
Balozi Ole Njolai, amesema pamoja na changamoto hizo, yeye aliamua kuthubutu na hatimaye alifanikiwa kuhitimu masomo yake.
Amesema kuwa baada ya kuhitimu masomo, hatua ya kuteuliwa kushika nafasi mbalimbali za uongozi ilikuwa kwake kama miujiza, kwa kuwa hakuwahi kuwa na ‘godfather’ wa kumshika mkono, bali alitambulika kwa uwezo wake na kuaminiwa kupewa majukumu.
“Nilishinda ujumbe wa NEC (Vijana) nikiwa na miaka 29, wakati huo nilikuwa mgeni kabisa ndani ya chama, lakini nikaomba kura kwa mara ya kwanza na nikachaguliwa,” anasimulia Balozi Ole Njolai.
Anasema ushindi huo ndio uliyoanzisha safari yake iliyofikia hatua ya kuteuliwa kwenye nafasi za ukuu wa mkoa kwenye mikoa mbalimbali kwa kipindi cha miaka 16, jambo ambalo analitaja kama miujiza maishani mwake.
Ameeleza kuwa faraja kubwa katika utumishi wake ilikuwa ni kuona wananchi wakiridhika na kufurahia utendaji wake, na hiyo ndiyo sababu iliyomsukuma kuandika kitabu hicho ili viongozi vijana wapate kujifunza na kunufaika kupitia uzoefu wa wale waliotumikia katika nafasi mbalimbali za kiutendaji serikalini.