Rais wa Ukraine Volodymyr Zelensky almekutana na viongozi wa Uingereza, Ufaransa, na Ujerumani jijini London Jumatatu, wakionyesha uungaji mkono wa Ulaya kwa Ukraine katika kile walichokielezea kama wakati “muhimu” katika juhudi zinazoongozwa na Marekani za kukomesha vita vinavyoongozwa na Urusi nchini Ukraine.
Imechapishwa:
Dakika 2 Wakati wa kusoma
Matangazo ya kibiashara
Waziri Mkuu Keir Starmer amekutana na Zelensky, Rais wa Ufaransa Emmanuel Macron, na Kansela wa Ujerumani Friedrich Merz huko 10 Downing Street ili kuimarisha msimamo wa Ukraine kutokana na ongezeko la kukosa subira kutoka kwa Rais wa Marekani Donald Trump.
Kufuatia mkutano huo, Starmer, Zelensky, na viongozi wengine waliwasiliana na washirika wa Kyiv wa Ulaya, wakiwasihi waendelee kumshinikiza Rais wa Urusi Vladimir Putin.
“Viongozi wote walikubaliana kwamba tuko katika wakati muhimu na kwamba lazima tuendelee kuongeza uungaji mkono wetu kwa Ukraine na shinikizo la kiuchumi kwa Putin ili kukomesha vita hivi vya kikatili,” ofisi ya Starmer imesema katika taarifa.
“Hii ni hatua kubwa zaidi ambayo tumepiga katika miaka minne, na tunakaribisha mwendelezo wa majadiliano haya katika ngazi zote,” amesema msemaji wa Starmer Tom Wells. Ameongeza kuwa “kazi kubwa” itaendelea katika siku zijazo, ingawa “baadhi ya maswali hayajapatiwa ufumbuzi.”
Ikulu ya Élysée imebainisha kwamba mkutano huo uliwezesha viongozi “kuendelea na kazi yao ya pamoja kwenye mpango wa Marekani ili kuikamilisha na michango ya Ulaya, kwa uratibu wa karibu na Ukraine.”
Akijibu maswali ya waandishi wa habari wakati wa mazungumzo ya WhatsApp Jumatatu alasiri, Zelensky alisema mpango wa sasa wa amani wa Marekani unatofautiana na matoleo ya awali kwa kuwa sasa una pointi 20, kutoka 28, baada ya kuondolewa kwa kile alichokiita “pointi zinazopinga waziwazi Ukraine.”
Kuhusu dhamana za usalama, Zelensky amesema maswali makuu yatakayoshughulikiwa ni: “Nini kitatokea ikiwa, baada ya vita kuisha, Urusi itaanzisha uchokozi mwingine? Washirika watakuwa tayari kwa nini? Ukraine itaweza kutegemea nini?”
Wakati wa mazungumzo na waandishi wa habari siku ya Jumapili jioni, Trump alionekana kuchanganyikiwa na Zelensky, akisema kiongozi huyo wa Ukraine “hajasoma pendekezo hilo bado.”
Siku ya Jumatatu, Zelensky alisema kwamba Trump “hakika anataka kukomesha vita… Hakika ana maono yake mwenyewe. Tunaishi hapa, tunaona maelezo na mambo madogo madogo, tunaelewa kila kitu kwa undani zaidi, kwa sababu hii ni nchi yetu.”
Starmer, Macron, na Merz walichukua msimamo mzuri zaidi kuelekea Kyiv katika taarifa zao kabla ya mkutano wao Jumatatu, ambao ulidumu kwa takriban saa mbili. Kiongozi huyo wa Uingereza alisema kwamba juhudi za amani zilikuwa katika “hatua muhimu” na akasisitiza hitaji la “kusitisha mapigano kwa haki na kwa kudumu.”
Wakati huo huo, Merz alisema ana “shaka” kuhusu baadhi ya maelezo katika hati zilizotolewa na Marekani. “Tunahitaji kuzungumzia hili. Ndiyo maana tuko hapa,” alisema. “Siku chache zijazo… zinaweza kuwa muhimu kwetu sote.”
Viongozi wa Ulaya wanafanya kazi kuhakikisha kwamba usitishaji wowote wa mapigano unakuja na dhamana kali za usalama kutoka Ulaya na Marekani ili kuizuia Urusi kutokana na mashambulizi zaidi. Trump hajatoa dhamana yoyote dhahiri hadharani.
Siku ya Jumapili jioni, Zelensky alisema kwamba mazungumzo yake na viongozi wa Ulaya, yaliyopangwa kufanyika wiki hii jijini London na Brussels, yatazingatia usalama, ulinzi wa anga, na ufadhili wa muda mrefu kwa ajili ya juhudi za vita vya Ukraine. Siku ya Jumatatu, alidai kwamba Ukraine ilihitaji msaada wa Ulaya na Marekani.