Baada ya elimu aliyoipata kwenye mradi Mwesigwa Edison ameanzisha na kukuza biashara yake ya asali na bidhaa zitokanazo na nyuki, hatua iliyomsaidia kuboresha maisha yake na pia kutoa ajira kwa vijana wengine katika jamii yake. Hapa anasema, “ufugaji nyuki hauhitaji hofu kubwa bali maandalizi mazuri ya eneo la kufugia”, anaendelea kueleza kwamba, “unachotakiwa ni kutambua eneo linalofaa, kuliandaa na kulitunza vizuri, kuliwekea mipaka na kupanda maua ili kuwavutia nyuki, kisha unawaacha nyuki waje na kuingia kwenye mizinga wenyewe.
Bidhaa vya duka la Mwesigwa Edison, mmoja wa vijana nchini Uganda ambao wamepata mafunzo ya vitendo kuhusu mbinu za kisasa za ufugaji nyuki.
Edison anasema kando na uzalishaji asali, ufugaji nyuki unaleta faida nyingi.
Nilipewa fursa ya kupata mafunzo zaidi na hata kusafiri hadi Kitgum kujifunza kutoka kwa wafugaji wengine wenye uzoefu. Kupitia mafunzo hayo niligundua kuwa hata baada ya kuvuna asali, masega yaliyobaki yanaweza kuongezewa thamani kwa kuyasafisha na kuyeyusha nta ili kutengeneza bidhaa kama rangi ya kung’arisha viatu na mishumaa.
Mwesigwa Edison anaeleza mafanikio yake kwenye kilimo cha nyuki;
Nilianza shughuli hiyo kwa mtaji wa shilingi za Uganda 400,000 (takribani dola 114 za Marekani), lakini sasa biashara hiyo imeniwezesha kuongeza kipato changu kwa kiasi kikubwa. Hapo awali sikuwa na usafiri, lakini sasa ameweza kununua pikipiki kutokana na mapato ya ufugaji nyuki. Pia amenunua kundi la mbuzi na kufungua duka. Nikijumlisha kila kitu nilichonacho sasa, mali zangu zinafikia zaidi ya shilingi milioni 30 za Uganda (takribani dola 8,463 za Marekani).
Kwa mujibu wa Mwesigwa Edison, mafunzo hayo yameongeza kwa kiasi kikubwa thamani ya mali yake, akisisitiza kuwa ufugaji nyuki umeleta matumaini mapya na kubadilisha maisha yake.