Mahakama ya Kimataifa ya Jinai (ICC) imefungua kesi dhidi ya kamanda wa zamani wa gereza la Libya, Mohammed Ali El Hishri, anayetuhumiwa kusimamia uhalifu dhidi ya ubinadamu katika kituo maarufu cha kizuizi cha Mitiga karibu na Tripoli.
Waendesha mashtaka wanadai kwamba maelfu ya wahamiaji na raia waliteswa, kunyanyaswa kingono, kuteswa na kufanywa watumwa chini ya mamlaka yake kati ya 2014 na 2020.
Kwa mujibu wa waendesha mashtaka, Mohammed Ali El Hishri alikuwa mmoja wa watu mashuhuri waliosimamia shughuli ndani ya gereza la Mitiga, ambalo kwa muda mrefu lilihusishwa na unyanyasaji dhidi ya wahamiaji na wafungwa katika kipindi cha migogoro na ukosefu wa utulivu nchini Libya.
Upande wa mashtaka unamtaja kama kamanda katili na mwenye kuzusha hofu ambaye alikuwa na udhibiti kamili dhidi ya wafungwa, hasa katika sehemu ya wanawake gerezani.
Nyaraka za mahakama zinamtaja El Hishri kwamba alishiriki binafsi katika kuwasaili wafungwa, mateso na unyanyasaji uliofanywa dhidi ya wanawake na watoto.
Kwa kipindi cha miaka sita, kwa uchache raia 5,000 wanaaminika kuteswa kimfumo ndani ya gereza, ambapo inadaiwa ukatili wa kimwili, kisaikolojia na kingono ulikuwa jambo la kawaida.
Baadhi ya waathiriwa wanawake walikuwa wakifungwa kwa kamba na kubururwa gerezani huku wakipigwa.
Kesi dhidi ya El Hishri inaangazia urithi mpana wa mfumo wa kuwaweka wahamiaji kizuizini nchini Libya, ambao umekabiliwa na shutuma za miaka mingi za mashirika ya kutetea haki za binadamu kuhusu mateso, unyonyaji na kuwekwa kizuizini kiholela.