Maprofesa 12 wa Chuo Kikuu cha Teknolojia cha Amirkabir cha Iran wametambuliwa miongoni mwa asilimia moja bora zaidi ya watafiti waliotajwa sana duniani, kwa mujibu wa ripoti ya hivi karibuni iliyotolewa na Taasisi ya Unukuzi na Ufuatiliaji wa Sayansi ya Ulimwengu wa Kiislamu (Islamic World Science Citation and Monitoring Institute (ISC)).
Orodha hiyo, iliyokusanywa kwa kutegemea data za hifadhidata ya Viashiria Muhimu vya Sayansi (ESI) inayotambuliwa kimataifa, inaangazia watafiti ambao kazi zao za kisayansi zimepata athari ya kipekee duniani kupitia viwango vya juu vya unukuzi.
Kujumuishwa wasomi 12 wa Chuo Kikuu cha Amirkabir katika orodha hiyo kunaonyesha ukuaji wa hadhi ya kitaaluma ya kimataifa ya chuo hicho na ushawishi wa kimataifa wa matokeo yake ya utafiti katika nyanja nyingi za kisayansi.
Wasomi hao wa Iran waliotajwa katika orodha hiyo ni Mohammad Rabiei, Fereydoun Moghaddas-Nejad, Gevork B. Gharehpetian, Heydar Ali Talebi, Mostafa Abbaszadeh, Sayyid Hossein Hassanian, Sayyid Mojtaba Agha-Mirsalim, Mehdi Dehghan, Mohammad Jalamid Zahran Shariati-Nia, na Mehrdad Abedi.
Tangazo hilo linakuja huku kukiwa na viashiria vipana vya maendeleo ya kisayansi nchini Iran katika jukwaa la kimataifa licha ya vikwazo vya kifedha na miundombinu ya nchi za Magharibi.
Kwa mujibu wa data mpya iliyotolewa na ISC, Iran kwa sasa inashika nafasi ya kwanza miongoni mwa wazalishaji 20 wa kisayansi wanaoongoza duniani katika ufanisi wa uchapishaji.
Rais wa ISC Mohammad Mehdi Alavian-Mehr amesema matokeo hayo yanaonyesha nguvu ya jamii ya kisayansi ya Iran na uwezo wake wa kubadilisha rasilimali chache za utafiti kuwa mafanikio ya kitaaluma yanayopimika na kuonekana kimataifa.