Idadi ya wagonjwa waliothibitishwa kuambukizwa virusi vya Ebola mashariki mwa Jamhuri ya Kidemokrasia ya Kongo (DRC) imefikia 1,003, ikiwa ni pamoja na vifo 254.
Imechapishwa:
Dakika 1 Wakati wa kusoma
Matangazo ya kibiashara
Idadi hii mpya ilitangazwa na mamlaka katika taarifa iliyotolewa Jumapili jioni, huku ufuatiliaji wa watu waliotagamana na wagonjwa ukiendelea kuwa changamoto kubwa.
Jumla ya watu 100 wamepona tangu mlipuko huo uanze, ukiwa umejikita katika mkoa wa Ituri, baada ya kutangazwa Mei 15. Angalau wagonjwa 365 kwa sasa wamelazwa hospitalini au wametengwa.
Mlipuko huu wa Ebola, uliosababishwa na virusi adimu vya Bundibugyo, ambavyo hakuna chanjo au matibabu yake, ulikuwa mbaya zaidi kuwahi kurekodiwa katika mwezi wake wa kwanza.
Mamlaka zinakubali kwamba kunaweza kuwa na wagonjwa wengi zaidi ambao bado hazijawatambua na kwamba kilele cha mlipuko wa ugonjwa bado kinakuja.
Kufuatilia waliotangamana na watu walioambukizwa bado ni changamoto kubwa kwa mamlaka, ambapo wamefikia kiwango cha chanjo cha 55% pekee, kulingana na Wizara ya Afya ya DRC.
Mamlaka bado hazijabaini “mgonjwa wa kwanza” wa mlipuko huo. Bado wanahitaji kuwafuatilia zaidi ya watu 35,000 ambao wametangamana na watu walioambukizwa, kulingana na takwimu za wiki iliyopita.
Hii ni kwa kiasi fulani kutokana na ukweli kwamba mashariki mwa DRC pia inakabiliwa na vurugu zinazoendelea ambazo zinasababishwa na waasi.
Mashambulizi yanayofanywa na waasi, na kuzidishwa na kundi lenye silaha la Daesh (Islamic State), yamezuia ufikiaji wa vijiji vingi na kulazimisha watu kutoroka makazi yao. Baadhi ya watu wamekimbilia katika kambi zilizojaa watu, huku wengine wakilazimika kuhama makazi yao kila mara.
Zaidi ya mwezi mmoja baada ya kuanza kwa mlipuko, maafisa wanabaini ugonjwa huo unaendelea kuzidi juhudi za udhibiti na kwamba kiwango chake halisi bado hakijulikani.
“Ikiwa unataka kudhibiti janga, haswa janga la Ebola, unahitaji kujua mgonjwa wa kwanza,” Dkt. Jean Kaseya, mkurugenzi mkuu wa Kituo cha Kudhibiti na Kuzuia Magonjwa, Shirika la Afya la Umoja wa Afrika aliambia The Associated Press wiki iliyopita.
“Na hatujui kwa hakika ni lini mlipuko huu ulianza,” alikiri.