Kanyari apiga abautani, akubali kushirikiana na Tash kuwalea watoto lakini kwa masharti mazito

• Mchungaji Kanyari alisema yuko tayari kushirikiana na Tash kulea watoto lakini akasisitiza kuwa watoto wake wanapaswa kwanza kuhamia nyumbani kwake Runda
• Mhubiri huyo alidai hana kinyongo chochote binafsi dhidi ya Tash, akisema jambo pekee analolihitaji ni kurejeshewa ulezi wa watoto wake wawili
• Kanyari pia hakukubaliana na kauli ya Sky Victor kuhusu kuolewa akiwa na miaka 25, akisema anataka kwanza ajikite katika kujenga taaluma ya ubunifu wa mitindo na uigizaji

Mchungaji Victor Kanyari ameonekana kulegeza msimamo wake katika mzozo unaoendelea wa ulezi wa watoto wake wawili, akisema yuko tayari kushirikiana na baba yao wa kambo, Hiram Gitau, maarufu kama Tash, katika kuwalea.

Katika siku za hivi karibuni, mhubiri huyo amekuwa akimkosoa Tash hadharani, akimtuhumu kwa kushindwa kuwalea ipasavyo watoto aliowapata na aliyekuwa mke wake wa zamani, mwimbaji wa nyimbo za injili Betty Bayo.

Baada ya Betty kufariki mwezi Novemba 2025 kufuatia kuugua saratani ya damu aina ya acute myeloid leukaemia, maswali yaliibuka kuhusu nani angewalea watoto wao wawili, Sky Victor na Danvictor.

Pia soma

Risiti zinazodaiwa kuwa za benki zake Sky zavuja na kutikisa vita vya malezi kati ya Kanyari na Tash

Ingawa Kanyari alieleza wazi kuwa alitaka kuwalea watoto hao na hata akanunua jumba la kifahari huko Runda, waliendelea kuishi katika nyumba yao ya Edenville Estate chini ya malezi ya Tash.

Hivi karibuni, suala hilo lilichukua mkondo mpya baada ya Kanyari kutumia ibada kanisani kumshutumu Tash kwa kuwatelekeza watoto.

Alidai kuwa Tash alishindwa kulipa karo yao ya shule na pia akasema amekuwa akinyimwa fursa ya kuwaona.

Kanyari aliendelea kufichua kuwa tayari amefungua kesi mahakamani akitaka apewe ulezi wa watoto wake.

Je, Kanyari yuko tayari kushirikiana na Tash kulea watoto?

Licha ya mivutano hiyo mikali, Kanyari alisisitiza kuwa hana tatizo lolote binafsi na Tash na bado yuko tayari kushirikiana naye kwa manufaa ya watoto.

Akizungumza na wanablogu baada ya ibada ya hivi karibuni kanisani, mhubiri huyo alisema yuko tayari kushirikiana katika malezi lakini kwa sharti kwamba watoto wahamie nyumbani kwake.

“Niko tayari kushirikiana kulea watoto, lakini si watoto waendelee kuishi nyumbani kwake. Watoto hao wanapaswa kuja kwangu, lakini kama anawapenda sana na anataka kuwaona, basi anaweza kuja kuwachukua na kutoka nao,” Kanyari alisema.

Alieleza kuwa mpangilio huo ni sawa na ule waliokuwa nao Betty alipokuwa hai, akisema alikuwa akiwachukua watoto mara kwa mara kwa matembezi kisha kuwarudisha nyumbani.

Pia soma

Kanyari apeleka vita vya malezi dhidi ya Tash kortini, adai wanawe wanatumiwa kama silaha

Kanyari pia alidai kuwa mawasiliano kati yake na Tash yalivunjika baadaye. Kulingana na mhubiri huyo, mara ya mwisho alipomtafuta kujadili kuhusu watoto, Tash alimwomba ampe muda wa kumwomboleza mke wake.

“Mara ya mwisho nilipozungumza naye kuhusu watoto, aliniambia nimpe muda wa kumwomboleza mke wake,” Kanyari alidai.

Mhubiri huyo pia alizungumzia video iliyosambaa mtandaoni ambapo binti yake, Sky Victor, alisema anatamani kuolewa akiwa na umri wa miaka 25 na kupata watoto.

Kanyari alisema hakukubaliana na maoni yake, akisema yalionyesha kuna masuala ya kina zaidi yanayohitaji kuangaliwa. Badala yake, alisema angependa kumsaidia kutimiza ndoto zake katika ubunifu wa mitindo na uigizaji.

Tazama video hapa chini:

Je, Tash alikutana na Karangu Muraya?

Katika habari inayohusiana, Tash alifanya kikao na mwimbaji wa nyimbo za injili Karangu Muraya huku mzozo wake wa ulezi na Kanyari ukiendelea kuvutia hisia za umma.

Karangu alifichua kuwa Tash alimfuata kutafuta ushauri, akisema uzoefu wake mwenyewe katika kupitia changamoto binafsi zilizopata umaarufu ulimwezesha kumpa ushauri wenye manufaa.

Pia soma

Shiro Stuart Afichua Siri Nzito za Nyumbani kwa Betty Bayo Baada ya Kifo Chake

Mwimbaji huyo pia alifichua kuwa Mbunge wa Gatundu North Elijah Kururia alihudhuria kikao hicho na kusema watatoa taarifa kuhusu matokeo ya mazungumzo yao baadaye.

Read ENGLISH VERSION

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia news@tuko.co.ke au WhatsApp: 0732482690.

Chanzo: TUKO.co.ke