Nchini Marekani, bajeti ya Idara ya Usalama wa Nchi, ambayo inasimamia Uhamiaji na Utekelezaji wa Forodha (ICE), bado imekwama katika Bunge, na hakuna azimio linalotarajiwa kwa sasa. Ingawa hatua za ICE zinabaki kuwa na utata, hali ya kuwaweka kizuizini wahamiaji pia inazua utata kutokana na idadi inayoongezeka ya vifo katika vituo hivi. Tangu mwanzoni mwa mwaka 2026, kumekuwa na vifo angalau 13.
Imechapishwa:
Dakika 1 Wakati wa kusoma
Matangazo ya kibiashara
Na mwandishi wetu huko New York, Loubna Anaki
Kulingana na takwimu zilizotolewa na Idara ya Usalama wa Nchi, idadi ya wahamiaji waliofariki wakiwa kizuizini ndiyo ya juu zaidi kuwahi kurekodiwa tangu shirika hilo lianze kufanya kazi mwaka wa 2003. Mnamo mwaka 2025, watu 33 walifariki. Tangu mwanzoni mwa mwaka 2026, angalau watu 13 wamefariki, na kufikisha jumla ya vifo kufikia 46 tangu Donald Trump aliporejea madarakani na kuanzisha kampeni yake kubwa ya kupambana na uhamiaji nchini Marekani.
Baadhi ya vifo hivi vimezunguzwa sana katika vyombo vya habari, hasa na familia za marehemu. Katika moja ya kesi kama hiyo, Emmanuel Damas, raia wa Haiti mwenye umri wa miaka 56, anaripotiwa kulalamika kuhusu maumivu ya jino kwa siku kadhaa bila kupata matibabu yoyote. Maafisa katika kituo cha kizuizini wanadaiwa kumpa dawa za kutuliza maumivu pekee. Aliishia kulazwa hospitalini akiwa na maumivu makali kabla ya kufariki. Familia yake iliarifiwa tu mara tu alipokuwa akitumia kifaa cha kumsaidia kupumua.
Kesi za aina hii zimeongezeka na kusababisha angalau kesi kumi na mbili dhidi ya Idara ya Usalama wa Nchi na vituo vya kuzuilia, ambavyo kwa kiasi kikubwa husimamiwa na makampuni binafsi – yaleyale yanayoendesha magereza ya Marekani.
Kampuni hizi, kama utawala wa Trump, zinakanusha makosa yoyote na zinasisitiza kwamba wahamiaji waliowekwa kizuizini wanatunzwa vizuri. Lakini hali za kizuizini zinazidi kukosolewa na mashirika ya haki za wahamiaji na maafisa waliochaguliwa kutoka chama cha Democratic ambao wanaomba usimamizi mzuri zaidi wa vituo hivyo.