Shirika la Umoja wa Mataifa la Msaada kwa Wakimbizi wa Kipalestina (UNRWA) limetangaza kuwa, theluthi moja ya watoto huko Gaza hawapati chakula cha kutosha cha kula kwa siku.
Kwa mujibu wa shirika la habari la Palestina Shehab, Shirika la Umoja wa Mataifa la Misaada na Kazi kwa Wakimbizi wa Kipalestina (UNRWA) limeripoti kushadidi mgogoro wa njaa katika Ukanda wa Gaza.
Kulingana na Kamati ya Kimataifa ya Uokoaji, mtoto mmoja kati ya watatu huko Gaza anakosa chakula kikamilifu kwa saa 24.
Hali hii inatokea sambamba na kuendelea mauaji ya kimbari ya utawala wa Kizayuni dhidi ya eneo Gaza tangu 7 Oktoba 2023.
Karibu Wapalestina 66,000 wengi wao wakiwa ni wanawake na watoto wadogo wameuawa shahidi tangu Israel ianzishe vita na mauaji ya kimbari katika Ukanda wa Gaza Oktoba 7, 2023.
Wakati huo huo, Shirika la Umoja wa Mataifa la Kuhudumia Watoto (UNICEF) limetangaza kuwa zaidi ya watoto 26,000 katika Ukanda wa Gaza wanahitaji matibabu ya haraka kutokana na utapiamlo mkali.
Hayo yanajiri katika hali ambayo, Taarifa ya UNICEF ya hivi karibuni ilisema kuwa, hali katika mji wa Gaza na katika Ukanda wote huo ni mbaya sana, bila chakula au dawa, na mbaya zaidi, watu wanajua kwamba hakuna msaada wa kweli wa kimataifa kwao, na hali itazidi kuwa mbaya zaidi.