Katika barua hiyo, familia hizo zimemtaka Trump kusimama kidete dhidi ya majaribio yoyote ya kuhujumu makubaliano yaliopatikana kufikia sasa. Pia imempongeza kwa mtazamo wake wa pande mbili katika kumaliza vita na kuwaleta mateka wote 48 nyumbani kinyume kabisa na vita vilivyopanuliwa ambavyo Israel inaendesha hivi sasa.
Israel inaamini mateka 20 kati ya 48 bado wako hai
Serikali ya Israel inaamini kuwa mateka 20 kati ya 48 bado wako hai. Kulingana na ripoti za vyombo vya habari, Trump anakusudia kuwasilisha kwa Netanyahu mpango unaoangazia masuala 21 ya kumaliza mapigano.
Inaripotiwa kuwa mpango huo unajumuisha kuachiliwa mara moja kwa mateka waliosalia kwa kubadilishana na mamia ya wafungwa wa Kipalestina, pamoja na kujiondoa kwa jeshi la Israel kutoka ukanda wa Gaza.