MSHAMBULIAJI wa Singida Black Stars, Mossi Nduwumwe anakuwa mchezaji wa kwanza kufunga hat-trick katika Ligi Kuu Bara msimu huu baada ya kuiongoza timu hiyo kuichapa Dodoma Jiji mabao 5-0 katika mchezo uliopigwa jioni ya leo kwenye Uwanja wa Airtel, Singida.
Nduwumwe alikuwa nyota wa mchezo huo baada ya kufunga mabao matatu yaliyowafanya wenyeji kuendelea kuimarisha nafasi yao katika mbio za kumaliza msimu kwenye nafasi za juu za msimamo wa ligi.
Bao la kwanza la Singida Black Stars lilifungwa na Nduwumwe dakika ya 27 akimalizia pasi ya Mashaka Yusuph kabla ya mshambuliaji huyo kuongeza la pili dakika ya 35 kwa pasi ya Linda Mtangi na kuwapa wenyeji uongozi wa mabao 2-0.
Dakika tano baadaye, Linda Mtangi naye aliiandikia Stars bao la tatu kwa pasi ya Yusuph, huku Singida Black Stars ikienda mapumziko ikiwa mbele kwa mabao 3-0.
Kipindi cha pili Singida iliendelea kutawala mchezo huo na kuongeza bao la nne dakika ya 67 kupitia kwa Mshamo Haji kabla ya Nduwumwe kukamilisha hat-trick yake dakika ya 83 na kuiandikia timu hiyo ushindi mnono wa mabao 5-0.
Hat-trick hiyo ni ya kwanza kushuhudiwa katika Ligi Kuu Bara tangu kuanza kwa msimu wa 2025/26, jambo linalomfanya Nduwumwe kuwa mchezaji wa kwanza kufikia rekodi hiyo msimu huu.
Mbali na kuandika rekodi hiyo, mabao matatu aliyofunga yamemfanya afikishe jumla ya mabao 12 katika mbio za kuwania kiatu cha ufungaji bora wa ligi.
Ushindi huo pia umeipa nguvu Singida Black Stars katika mbio zake za kuwania nafasi ya nne, huku Dodoma Jiji ikiendelea kupata wakati mgumu baada ya kupokea kipigo kizito zaidi katika mechi za hivi karibuni.
Kwa matokeo hayo, Singida Black Stars imeendelea kujikita nafasi ya nne kwenye msimamo wa ligi na pointi 47 ikicheza mechi 27 huku Dodoma Jiji ikiendelea kusalia nafasi ya nane.