Jeshi la Iran la Walinzi wa Mapinduzi ya Kiislamu (IRGC) limethibitisha utayari wake wa kuwapa maadui “kichapo kikubwa cha kihistoria” iwapo wataendeleza madai yao ya kupita kiasi na kukiuka haki za taifa tukufu la Iran.
Katika taarifa iliyotolewa Ijumaa, IRGC ilijibu ujumbe wa Kiongozi wa Mapinduzi ya Kiislamu, Ayatullah Sayyid Mujtaba Khamenei, kufuatia kutiwa saini kwa Mkataba wa Maelewano (MoU) uliokomesha rasmi vita vya uchokozi dhidi ya Jamhuri ya Kiislamu vilivyoongozwa na Marekani na utawala wa Israel.
IRGC imesifu “ujumbe wa hekima” wa Kiongozi, ikisema kuwa umedumisha umoja wa kitaifa na kuongeza matumaini miongoni mwa wananchi na wapiganaji katika kulinda mafanikio yao ya ushindi.
Taarifa hiyo iliongeza kuwa wananchi wa Iran na wapiganaji wanatarajia kuwa ulingo wa kisiasa utakuwa mwendelezo wa ulingo wa vita, ili kuhakikisha haki zao zinalindwa kikamilifu.
IRGC imesisitiza kuwa: “Adui mchokozi ameshindwa katika medani ya vita mbele ya mwamko wa kihistoria wa taifa hili na mafanikio makubwa ya wapiganaji wa Uislamu. Kutoka nafasi ya kutaka kuifuta Iran kwenye ramani na kuirudisha katika zama za giza, sasa wamejishusha hadi kuomba mazungumzo na kupiga magoti mbele ya utukufu wa taifa letu.”
IRGC imeongeza kuwa: “Taifa hili pendwa na wapiganaji wa Uislamu wako imara kama mlima, wakiwa wamewazunguka viongozi wao. Na ikiwa adui mwenye kuvunja ahadi ataamua kurudia madai ya kiburi na kukiuka haki za taifa la Iran kama ilivyokuwa huko nyuma, vikosi vya IRGC, ambavyo sasa vimeimarika zaidi nchi kavu, baharini, angani, na katika nyanja zote za vita vya mseto (hybrid warfare), viko tayari kuwapa maadui hawa kichapo kikubwa zaidi cha kihistoria kwa ishara ndogo tu kutoka kwa Kamanda wao shujaa na mwenye hekima.”
Rais wa Iran, Masoud Pezeshkian, na mwenzake wa Marekani, Donald Trump, wametia saini kwa njia ya mtandao Mkataba huo wa Maelewano (MoU) wenye vipengele 14. Mkataba huo unajumuisha ahadi kutoka nchi zote mbili kuendelea na mazungumzo ya makubaliano ya mwisho katika kipindi cha siku 60 zijazo.
Mkataba huo unatoa wito wa kusitishwa kabisa kwa uadui katika pande zote, ikiwemo Lebanon; kuondolewa kwa vikwazo vya Marekani kwa awamu; kufutwa kwa kizuizi cha majini dhidi ya Iran; na kurejeshwa kwa shughuli za kibiashara kupitia Lango la Hormuz ndani ya siku 30.
Pia, mkataba huo unajumuisha mpango wa ujenzi na maendeleo ya kiuchumi kwa Iran unaoungwa mkono na Marekani wenye thamani ya angalau dola bilioni 300, vibali vya kusafirisha mafuta, kuachiwa kwa mali za Iran zilizokuwa zimezuiliwa, na ahadi mpya ya Iran ya kutotafuta silaha za nyuklia, huku mazungumzo zaidi yakiendelea kuhusu akiba ya urani iliyorutubishwa ya Tehran.