Beki wa Yanga, Ibrahim Abdullah ‘Bacca’ amefungiwa michezo mitano kwa kosa la kumkanyaga kwa makusudi mchezaji wa Klabu ya Mbeya City, Ibrahim Ame katika mchezo wa Ligi Kuu Tanzania Bara namba 022 baina ya Mbeya City na Yanga uliomalizika kwa sare ya bila kufungana.
Taarifa iliyotolewa leo, Ijumaa, Oktoba 3, 2025 imeeleza kuwa rafu hiyo ya Bacca kwa Ame ilionekana kuwa mbaya zaidi na ingeweza kuhatarisha usalama wa mchezaji huyo.
Adhabu hiyo ni kwa mujibu wa Kanuni ya 41:21 ya Ligi Kuu kuhusu Udhibiti wa Wachezaji.
Kanuni hiyo inasoma hivi,”Mchezaji atakayefanya jambo lolote kati ya yafuatayo atafungiwa michezo isiyopungua mitatu (3) na/au faini isiyopungua shilingi laki tano (500,000/-) mpaka milioni mbili (2,000,000). 5.1 Kutojiunga na Timu ya Taifa kwa sababu yoyote isiyo ya msingi. 5.2 Kupigana/kupiga kabla, wakati wa mchezo au mara tu baada ya mchezo kumalizika. 5.3 Kumshambulia mwamuzi, kiongozi, mtazamaji au mtu yoyote kwa namna yoyote ile, iwe kwa matusi au kwa vitendo. 5.4 Kufanya kitendo chochote cha aibu, kama vile kukojoa kiwanjani, kukataa kupeana mkono na mgeni rasmi, waamuzi na wachezaji wa timu pinzani, kutoa au kuonesha ishara inayoashiria matusi.
5.5 Kufanya vitendo vyenye kuonesha imani za ushirikina na uchawi hadharani au vitakavyobainishwa kwa ushahidi mwingineo. 5.6 Kufanya kitendo chochote kingine kitakachobainika kuwa ni kinyume cha maadili ya mchezo wa mpira wa miguu.”
Kwa adhabu hiyo, Bacca atakosa mechi dhidi ya Mtibwa Sugar, Tanzania Prisons, KMC, Namungo na Coastal Union.
Kwa maana hiyo, beki huyo atarejea uwanjani katika mchezo dhidi ya Simba, Desemba 13 mwaka huu.
Mwamuzi wa mchezo huo, Omary Mdoe ameondolewa katika orodha ya waamuzi katika mizunguko mitano kwa kosa la kutompa kadi nyekundu Bacca na pia kushindwa kuipa Yanga pigo la penalti baada ya Matheo Anthony wa Mbeya City kunawa mpira katika eneo la hatari.
Mchezaji wa JKT Tanzania, Mohamed Bakari amefungiwa idadi ya mechi tano kwa kosa la kumkanyaga kwa makusudi mchezaji wa Azam FC, Lusajo Mwaikenda katika mchezo baina ya timu hizo.
Refa wa mchezo baina ya JKT Tanzania na Azam, Jackson Samweli ameondolewa katika orodha ya waamuzi kwa mizunguko mitano kwa kosa la kushindwa kutafsiri vyema sheria za mpira wa miguu na kushindwa kuchukua hatua kwa vitendo vya ukiukwaji wa sheria za mpira.
Singida Black Stars imetozwa faini ya Sh500,000 kwa kosa la ubao wa kuonesha matokeo kwenye uwanja wake wa nyumbani, KMC Complex kutofanya kazi kama
ilivyoelekezwa kwenye Kanuni ya Leseni za Klabu.
Timu hiyo ya Singida Black Stars pia imepewa Onyo Kali kwa kosa la kuchelewa kuwasili kwenye uwanja wa KMC Complex kuelekea mchezo husika ambao ilicheza na Mashujaa FC.
Klabu ya KMC imetozwa faini ya Sh500,000 (laki tano) kwa kosa la ubao wa kuonesha matokeo kwenye uwanja wake wa nyumbani, KMC Complex kutofanya kazi kwenye mechi dhidi ya Dodoma Jiji kama ilivyoelekezwa kwenye Kanuni ya Leseni za Klabu.
Pamba Jiji metozwa faini ya Sh5 milioni kwa kosa la kuchapisha picha jongeo (video) kwenye ukurasa rasmi wa klabu hiyo katika mtandao wa Instagram, kiwanesha wachezaji wa klabu hiyo wakifanya mazoezi gizani ndani ya uwanja wa Benjamin Mkapa Septemba 23, 2025, jambo ambalo lilizua taharuki na kuchafua taswira ya Ligi huku ikikosekana sababu ya msingi ya wao kufanya hivyo.
KMC imetozwa faini ya Sh500,000 kwa kosa la ubao wa kuonesha matokeo kwenye uwanja wake wa nyumbani, KMC Complex kutofanya kazi kwenye mechi dhidi ya Singida Black Stars kama ilivyoelekezwa kwenye Kanuni ya Leseni za Klabu.
Dodoma Jiji imetozwa faini ya Sh5 milioni kwa kosa la kuanza msimu wa Ligi Kuu na kucheza mchezo wa Ligi bila kuwa na kocha mwenye ujuzi kwa mujibu wa Kanuni ya 77:3(1, 2, 3).
Tanzania Prisons imetozwa faini ya Sh. 5,000,000 (milioni tano) kwa kosa la mashabiki wake kufanya vurugu na kuingia kwenye uwanja wa Kasim Majaliwa bila kufuata utaratibu wakati wa mchezo tajwa hapo juu.