AKAENDELEA: “Utajua aliua saa ngapi na kwa kutumia silaha ipi. Alisimama hatua ngapi na marehemu kabla ya kumuua na alitumia mkono gani wa kulia au wa kushoto. Kila kitu utakiona wazi wazi kama sinema.”
Maelezo ya inspekta huyo yalitufanya sote tubaki kimya.
Kwa sababu ya kutaharuki Sajin Meja Robet aliondoka kwenye kiti akaja mbele ya meza ili kumuona huyo muuaji aliyeambiwa.
Alipomuona Sajin Meja Robert amesogea mbele ya meza akionyesha shauku ya kumsikiliza, Inspekta Amour alimtazama mlinzi aliyeachiwa gari na Shefa.
“Unaitwa nani?” akamuuliza.
“Naitwa Thobias Marwa,” mlinzi huyo akajibu.
“Una umri gani?”
“Nina umri wa miaka arobaini na mitano.”
“Una miaka mingapi katika kazi ya ulinzi?”
“Nina miaka kumi.”
“Katika kipindi hiki lindo lako liko wapi?”
“Liko katika eneo la Ngamiani Mtaa wa Barabara ya tisa”
“Unalinda nini?”
“Duka na nyumba.”
“Unaingia kazini saa ngapi na unatoka saa ngapi?”
“Pale ninaingia kazini saa kumi na mbili jioni, ninatoka saa kumi na mbili asubuhi.”
“Katika siku za hivi karibuni. Kuna mtu yeyote aliyekuachia gari lake ukiwa katika lindo lako?”
“Ndiyo. Yuko mtu mmoja aliyeniachia gari.”
“Ilikuwa saa ngapi alipokuachia hilo gari?”
“Sikutazama saa lakini ilikuwa kama saa sita usiku.”
“Alipokuachia gari alikwambia nini?”
“Aliniambia nimtazamie. Alikuwa Anakwenda katika nyumba moja pale pale jirani. Aliniambia angechelewa kidogo.”
“Ni nyumba gani ambayo aliingia baada ya kukuachia gari?”
“Aliingia nyumba ya tatu kutoka ile nyumba niliyokuwa ninalinda.”
“Unawafahamu watu wanaoishi katika nyumba hiyo?”
“Siwafahamu lakini huyu kijana hapa na huyu msichana, huwa ninawaona ona mara nyingi. Nafikiri wanaishi pale.”
Alinionesha mimi na Sufiani.
“Kwa hiyo ulimuona akibisha mlango na kuingia?”
“Ndiyo.”
“Baada ya kuingia alitoka na kuja kuchukua gari lake?”
“Kwa usiku ule hakutoka tena na hadi ninaondoka asubuhi gari lilikuwa pale pale. Limekaa pale kwa karibu siku tatu. Yule jamaa sikumwona tena.”
“Wakati ule wa usiku alipoliacha gari, uliona nini?”
“Mida kama ya saa tisa usiku niliona pikipiki ikisimama pale barazani mwa ile nyumba. Nadhani ilikuwa pikipiki ya bodaboda na ilikuwa imepakiza mwanamke….”
Mlinzi alisita kidogo akanitazama mimi kabla ya kuendelea.
“Mwanamke huyo alishuka. Alikuwa ameshika mfuko, akaujaribu mlango na kuona umefungwa. Akasogea kwenye dirisha na kuanza kulichokonoa. Nilisikia vipande vya vioo vikianguka chini. Mimi nilidhani ni mwenyewe amepoteza funguo, nikawa natazama tu.”
“Baada ya hapo nini kilitokea?” Inspekta Amour akaendelea kumuuliza.
“Baada hapo nikaona yule mwanamke akijipenyeza katika lile dirisha hadi ndani. Yule mwenye pikipiki alikuwa amesimama kwenye lile dirisha akichungulia lakini baada ya muda yule mwanamke akatoka kupitia kwenye dirisha lile lile. Akajipakia kwenye ile pikipiki wakaondoka na yule jamaa.”
“Uliweza kuwaona vizuri na kuwajua walikuwa kina nani?”
“Kwa kweli sikuwajua ila ile pikipiki niliijua kwa sababu mara kwa mara ninaona inamleta yule mwanamke pale nyumbani. Nadhani ni pikipiki ya bodaboda.”
“Ulikariri namba ya pikipiki hiyo?”
“Namba niliikariri.”
“Hebu itaje kama kweli uliikariri?”
Mlinzi akataja namba za usajili za pikipiki hiyo aliyokuwa akiizungumzia.
Amour akamwambia.
“Sasa subiri hapo hapo.” Akamtazama Sajin Meja Robert na kumwambia.
“Baada ya kumuona mlinzi huyu na kunipa maelezo hayo nilianza kuitafuta ile pikipiki. Kwa msaada wa polisi wa usalama barabarani pikipiki ilikamatwa mara moja. Ilikutwa katika kituo cha bodaboda cha Kwaminchi. Mwenye pikipiki ndiye huyu hapa niliyekuja naye. Sasa nataka na yeye mumsikilize.”
Inspekta Amour akamatazama yule kijana wa bodaboda.
“Unaitwa nani?” akamuuliza.
“Naitwa Mohammed Juchu au kwa kifupi Mudi.”
“Unafanya kazi ya bodaboda?”
“Ndiyo.”
“Umeyasikia maelezo ya mlinzi?”
“Ndiyo.”
“Unakubali kwamba ulitumia pikipiki yako kumpeleka msichana fulani nyumbani kwa Sufiani saa tisa usiku.”
“Ndiyo ninakubaliana na maelezo hayo.”
“Tuambie alikukodi wapi na alikwambia alifuata nini nyumbani kwa Sufiani?”
“Kusema kweli yule msichana ni mteja wangu wa mara kwa mara. Siku ile aliniambia nimfuate nyumbani kwake saa nane usiku kwa vile alikuwa na safari. Mimi nikaenda nyumbani kwake muda huo nikakuta ananisuriri.”
“Akakwambia nini?”
“Akaniambia nimpeleke barabara ya tisa kwa mdogo wake. Kulikuwa na kitu amekisahau na mdogo wake mwenyewe alikuwa hayupo.”
“Enhe… ulimpeleka?”
“Ndiyo nilimpeleka.”
“Mlipofika, nini kilitokea?”
“Aliniambia alikuwa ameachiwa funguo na mdogo wake huyo lakini amezipoteza hivyo ikabidi avunje dirisha ili achukue hicho kitu alichokisahau.”
“Alikwambia alisahau nini?”
“Sikumuuliza.”
“Alivunja dirisha kwa kutumia kitu gani?”
“Alitoa rungu kwenye mfuko wake. Alikuwa ameshika mfuko wa Rambo. Akavunja vioo kisha akatanua nondo za dirisha mpaka akapata uwazi akajipenyeza ndani.”
“Wakati anafanya hivyo, wewe hukupata wasiwasi wowote?”
“Sikupata wasiwasi kwa sababu pale nyumbani huwa ninamleta mara kwa mara na alishaniambia ni kwa mdogo wake. Kwa hiyo mimi niliamini alichoniambia.”
“Enhee… alipojipenyeza ndani alifanya nini?”
“Kwanza aliwasha taa kisha akaizima. Akatulia kimya kwa karibu nusu saa. Pale ndani palikuwa kiza lakini ukitazama kiza kwa muda mrefu macho yanakizoea na unaweza kuona kitu japokuwa si kwa uwazi. Hivyo ndivyo nilivyomuona amesimama nyuma ya mtu halafu nikaona ameuinua mkono wake wa kushoto. Baada ya hapo nikasikia mlio wa kitu kama nazi iliyovunjika, ukafuatiwa na kishindo cha kuanguka kwa kitu…”
Wakati kijana wa bodaboda akieleza hayo mara kwa mara Inspekta Amour alikuwa akimtazama Sajin Meja Robert.
Kijana wa bodaboda aliendelea kueleza.
“Kwa sababu palikuwa kiza sikuwa na uhakika wa kile nilichokuwa nakiona. Yule msichana alipotoka akaniambia ni gunia lililoanguka, ndio maana palisikika kishindo. Nilimuamini na sikumuuliza kitu.”
“Alipotoka alikuwa na lile rungu?”
“Hakuwa na rungu.”
“Aliliacha kule ndani?’
“Ndiyo, aliliacha ndani.”
“Ulipompakia ulimrudisha wapi?”
“Nilimrudisha nyumbani kwake.”
“Hebu tueleze ukweli, licha ya yeye kukueleza alisahau kitu mle ndani lakini wewe ulishuku alikwenda kufanya nini?”
“Kusema kweli sikushuku chochote.” Amour akamtazama Sajin Meja Robert kisha akayatembeza macho yake kututazama sisi.
“Bila shaka mnataka kumjua na kumuona huyo msichana?” akatuuliza.
“Tunataka kumuona” Sajin Meja akamjibu huku akiwa amepigwa na butwaa.
“Lakini Meja unaonaje, yeye si ndiye muuaji wa Shefa?”
“Kwa ushaidi huu uliotolewa hapa atakuwa ndiye yeye.”
“Kwa hiyo na yeye atatueleza alichofanya mle ndani na kwanini alifanya hivyo.”
Amour akatoka katika kile chumba. Baada ya dakika tatu akaingia tena akiwa amefuatana na msichana mmoja. Mimi binafsi nilikuwa simfahamu. Naamini hata Sufiani alikuwa hamfahamu. Sajin Meja Robert alikuwa amemkodolea macho ya udadisi.
Nikawa najiuliza kama yeye ndiye aliyemuua Shefa. Na kama ni yeye alimuua kwa sababu gani.
“Matilda nataka uendelee kuwa mkweli na muwazi. Tueleze rafiki yako alikwambia nini kuhusu uhusiano wake na Sufian?” Inspekta Amour akamwambia yule msichana aliyeingia naye.
Niliposikia Sufiani anatajwa, moyo wangu ukashtuka.
“Aliniambia alikuwa anampenda sana Sufiani na alitaka siku moja awe mke wake lakini kikwazo kilikuwa kwa mke wa Sufiani. Yeye na mke wa Sufiani walikuwa wana urafiki.
“Lakini wakati akiniambia anampenda Sufiani, tayari alikuwa yuko naye kimapenzi. Siku moja moja Sufiani huwa anaaga kwa mke wake kuwa anakwenda Dar, kumbe anakwenda kulala kwake. Hata baadhi ya nguo za Sufiani ziko kwake. Mwenyewe Sufiani anamwambia mke wake nguo zimeibiwa kwa dobi. Ikafikia siku akaniambia atafanya jambo kubwa litakalomhakikishia anampata Sufiani na kuwa mume wake bila kificho.
“Jambo lenyewe lilikuwa kuwaunganisha mke wa Sufiani na Shefa. Akaja akaniambia kwamba alifanikiwa kuwaunganisha shefa na mke wa Sufiani na hivyo tayari ameshatengeneza fitina kati ya Sufiani na mke wake.
“Akaja akaniambia amepanga siku ya kuwakutanisha Shefa na mke wa Sufiani ambapo Shefa atakwenda nyumbani kwa Sufiani ambapo Sufiani atakuwa amemuaga mke wake anakwenda Dar lakini hatakwenda Dar bali atakuwa naye gesti. Lengo lake lilikuwa Sufiani awepo Tanga ili alishuhudie hilo tukio ambalo shoga yangu alikuwa amelipanga.
“Usiku wa siku ile shoga yangu alikuwa gesti na Sufiani hadi saa sita usiku na alimuacha Sufiani baada ya kumdanganya hawezi kuendelea kulala gesti kwa kuogopa wezi wasije wakavunja nyumba yake. Aliporudi nyumbani kwake akasubiri muda alioupanga ulipowadia akampigia simu mwenye bodaboda wake, ndipo akapelekwa nyumbani kwa Sufiani ambako Shefa alikuwepo.
“Asubuhi yake nilipokutana naye ndipo aliponiambia ameshalifanya hilo jambo na karibuni atamtia mikononi Sufiani.”
Inaendelea…