Wachezaji wa timu ya taifa ya Ufaransa, Kylian Mbappe na Ousmane Dembele, usiku wa kuamkia leo walifunga magoli muhimu yaliyotamatisha safari ya wawakilishi pekee wa Afrika waliokuwa wamesalia kwenye fainali za kombe la dunia, timu ya taifa ya Morocco na kutinga hatua ya nusu fainali.
Imechapishwa:
Dakika 1 Wakati wa kusoma
Matangazo ya kibiashara
Goli alilofunga Mbappe linamfanya sasa afikishe jumla ya mabao 8 katika fainali za mwaka huu, huku akisimika zaidi rekodi yake ya mabao kwenye timu ya taifa.
Goli lililozamisha jahaza la Morocco na kuzima ndoto ya simba wa milima ya Atlas kufuzu hatua ya nusu fainali lilifungwa katika dakika ya 66 ya mchezo na mchezaji Ousmane Dembele.
Ushindi wa Ufaransa, unazidisha imani kuwa huenda wakatwaa taji la mwaka huu kama walivyofanya mwaka 2018 nchini Urusi, hata hivyo watakuwa na kibarua kigumu kufuzu fainali ambapo wanasubiri mshindi kati ya Ubelgiji au Uhispania watakaocheza baadae hivi leo.
Kabla ya mchezo na Ufaransa, Morocco wawakilishi pekee kutoka Afrika waliofika hatua ya robo fainali, walikuwa wanapewa nafasi ya kufanya vizuri hasa baada ya kuwatupa nje wenyeji Canada kwa mabao 3 kwenye hatua ya 16 bora, ambapo ilionesha kiwango kizuri.
Kufika mwisho kwa safari ya Morocco kwenye michuano ya mwaka huu, kunazima rasmi ndoto na historia ya bara la Afrika ambalo katika fainali za mwaka huu lilikuwa na rekodi ya timu 10 ambapo tisa zilifuzu hatua ya 32 kabla ya kutolewa.