Chanzo cha picha, Getty Images
Liverpool imeibuka na ushindi mwembamba wa bao 1-0 dhidi ya Arsenal katika Anfield, ushindi uliopatikana kupitia mpira wa adhabu wa Dominik Szoboszlai dakika ya 83. Bao hilo la kipekee limewarudisha mabingwa wa msimu uliopita kileleni mwa msimamo, wakiwa na ushindi mitatu mfululizo tangu kuanza kwa ligi. Martin Zubimendi alimchezea vibaya Curtis Jones na kupewa kadi ya njano kabla ya Szoboszlai kufunga bao hilo la ushindi. Kwa Arsenal, ni tena simulizi ya kukosa nafasi muhimu na kuishia kujiuliza “ingekuwaje kama…”
Wakati huo huo, Manchester City wamepoteza kwa mara ya pili mfululizo baada ya kulala 2-1 ugenini dhidi ya Brighton kwenye Uwanja wa Amex. Licha ya Erling Haaland kuwapa City bao la kuongoza kipindi cha kwanza, Brighton walipiga hatua kubwa kipindi cha pili. James Milner alisawazisha kupitia penalti, kisha Brajan Gruda akafunga bao la ushindi dakika ya 89 na kupeleka mashabiki wa Brighton mtaani kwa shangwe.
Katika mchezo mwingine, West Ham waliandika historia yao ya kwanza ya ushindi msimu huu kwa kuwachapa Nottingham Forest 3-0. Mabao yote matatu yalipatikana ndani ya dakika sita za mwisho kupitia Jarrod Bowen, Lucas Paquetá (penalti) na Callum Wilson, na kumpa kocha Graham Potter pumzi mpya baada ya kuanza msimu vibaya.
Kabla ya mchezo wa Liverpool v Arsenal
Liverpool walikuwa hawajapoteza mchezo wowote katika michezo 18 ya mwisho ya ligi kuu waliyocheza nyumbani Anfield tangu kuchapwa 1-0 na Nottingham Forest Septemba iliyopita. Sasa wameendeleza rekodi
Nao Arsenal walikuwa hawajapoteza katika michezo yao 15 ya mwisho ya Ligi kuu ugenini. Rekodi ndefu zaidi ya Arsenal ugenini ilikuwa Aprili 2003 – Septemba 2004 (michezo 27) na Agosti 2001 – Septemba 2002 (michezo 23). Sasa rekodi yao imeishia hapo.
Tangu mwanzo wa msimu wa 2022/23, Arsenal hawajapoteza mechi yoyote ya Ligi kuu walizocheza mwezi Agosti, walishinda 11 na sare 2 (W11 D2). Sasa wamekutana na Liverpool leo 31, mwezi Agosti na wamepoteza kwa mara ya kwanza tangu kipindi hicho.
Liverpool vs Spurs (206) imeshuhudia mabao mengi zaidi ya mechi yoyote ya Ligi Kuu, ikilinganishwa na Arsenal vs Liverpool (198). Tangu msimu wa 2015/16, ni mechi kati ya Arsenal vs Liverpool iliyoshuhudia mabao mengi zaidi (79 katika michezo 21).