Katika ujumbe wake aliyoutoa kwa njia ya vidio Zelensky aliwataka wabunge kuunga mkono ombi lake. Galushchenko, waziri wa zamani wa nishati ambaye baadae alishika wadhifa wa waziri wa sheria mwezi Julai alifanyiwa msako nyumbani kwake na leo Jumatano (12.11.2025), alisimamishwa kwa muda katika wadhifa wake huo baada ya kikao maalum cha baraza la mawaziri.
Galushchenko, ni miongoni mwa washukiwa kadhaa ambao maafisa wa Ukraine wanadai walihusika na ufisadi unaofungamanishwa na miradi ya miundombinu ya nishati nchini humo. Bado uchunguzi juu ya madai hayo unaendelea. Galushchenko hata hivyo amekanusha madai yanayomkabili.
Sakata hilo kubwa la ufisadi na madai ya kwamba ofisi ya rais Zelensky inatumia mahakama kuwatisha na kuwanyamazisha wakosoaji limeitikisa Kiev ikitoa changamoto na mtihani mkubwa kwa rais Zelensky takriban miaka minne ya vita kati ya Urusi na Ukraine.
Huku hayo yakiarifiwa wanadiplomasia wakuu kutoka mataifa saba yaliyoendelea kiviwanda duniani G7, wanakutana nchini Canada na waziri wa mambo ya nje wa Ukraine, Andrii Sybiha, wakati Kiev ikijaribu kudhibiti mashambulizi ya angani kutoka Urusi ambayo yamesababisha umeme kukatika katika maeneo mengi nchini humo kuelekea kipindi cha baridi kali.
Waziri wa mambo ya nchi za nje wa Marekani Marco Rubio, atashiriki kikao cha G7 kinachojumuisha mataifa ya Canada, Marekani, Uingereza, Ufaransa, Ujerumani, Italia na Japan, kujadili vita vya Ukraine pamoja na ushirikiano wa kiulizi. Waziri mwenzake wa Canada Anita Anand ndio mwenyeji wa mkutano huo unaofanyika katika eneo la Kusini la Ontario.
Mkutano huo unajiri wakati mvutano ukiongezeka kati ya Marekani na washirika wake kama Canada kuhusu matumizi ya bajeti ya ulinzi, biashara na kutokuwa na uhakika juu ya mpango wa rais Donald Trump wa kusitisha vita Gaza na juhudi za kukomesha vita vya Urusi na Ukraine.
Haya yanafanyika wakati rais wa Ukraine Volodymyr Zelensky akisema anataka kuagiza mifumo 25 ya ulinzi wa anga ya Patriot, kutoka Marekani ili kuendelea kujikinga na mashambulizi ya Urusi.
Ndani ya Ukraine kwenyewe kumeripotiwa mauaji ya mtu mmoja kufuatia shambulizi la droni la Urusi Kusini Mashariki mwa Dnipropetrovsk. Moindo mbinu huko inaarifiwa kuharibiwa vibaya.
Gavana wa eneo hilo Vladyslav Haivanenko, amesema aliyeuwawa ni mwanaume aliye na miaka 47 huku akisema kwamba mji ulioko karibu wa Pavlohrad pia ulishambuliwa. Droni zilizovurumishwa pia mjini Kharkiv zilisababisha watu watano kujeruhiwa, makaazi ya raia pamoja na biashara kuharibiwa huku majengo mawili yakichomwa moto.