Takriban watu 29, wakiwemo wagonjwa wameuawa katika shambulio linalodaiwa kufanywa na waasi wa Allied Democratic Forces (ADF) ambalo lililenga kituo cha afya na vijiji kadhaa mashariki mwa Jamhuri ya Kidemokrasia ya Kongo.
Wakazi na maafisa wa eneo la Lubero wamesema kuwa wamekuta miili 23 katika kituo cha afya cha Byambwe katika jimbo la Kivu Kaskazini kufuatia hujuma ya waasi ya wa ADF.
Kanali Alain Kiwewa afisa utawala wa eneo la Lubero ameeleza kuwa wahanga wa mauaji hayo waliokutwa katika kituo cha afya ni pamoja na wanawake 11. Amesema raia wengine kadhaa waliuawa katika vijiji vitatu vya karibu na eneo hilo.
Inafaa kuashiria hapa kuwa, Byambwe ni kituo cha afya cha rufaa kwa ajili ya wakaazi huko Kivu Kaskazini ikiwa ni pamoja na wale waliokimbia makazi yao kutokana na ghasia zinazoendelea.
Duru za habari za ndani pia zimeripoti kuwa waasi wa Allied Democratic Forces (ADF) pia wamechoma moto baadhi ya majengo ya kituo hicho cha afya pamoja na nyumba kadhaa.
Kanali Alain Kiwewa amesema kuwa mashambulizi dhidi ya vituo vya afya ni jinai dhidi ya binadamu. Amesema vitendo hivyo vya ukatili haviwezi kuacha hivi hiv bila ya kuadhibiwa. Afisa utawala wa eneo la Lubero amewataka wakazi wa eneo hilo kuunga mkono oparesheni za kijeshi za pamoja zinazotekelezwa na majeshi ya Kongo na Uganda kwa lengo la kuliangamiza kundi la waasi wa ADF.
Waasi wa ADF wamefanya mashambulizi hayo wiki kadhaa baada ya raia wasiopungua 20 kuuawa na wengine kadhaa kujeruhiwa katika shambulio linalodaiwa kufanywa na waasi hao huko Lubero mwezi Oktoba mwaka huu.