Mahakama ya Nigeria imemhukumu Nnamdi Kanu, kiongozi wa harakati ya kupigania kujitenga ya Watu wa Asili wa Biafra (IPOB), kifungo cha maisha jela baada ya kumpata na hatia ya mashtaka yote saba aliyoshtakiwa yanayohusiana na ugaidi.
Hukumu dhidi ya Kanu imetolewa baada ya kesi iliyofunguliwa dhidi yake iliyodumu kwa takriban muongo mmoja, ambayo imechochea kujitenga kwa eneo la Biafra lililoko kusini-mashariki mwa Nigeria.
Jaji James Omotosho alisema wakati anasoma hukumu hiyo kuwa Kanu alihamasisha mashambulizi dhidi ya vikosi vya usalama na raia kupitia matangazo na maagizo yake kwa IPOB.
“Nia yake ilikuwa wazi kabisa kwani aliamini katika utumiaji nguvu. Vitisho hivi vya utumiaji nguvu vilikuwa ni matendo ya kigaidi, ambayo yalitekelezwa na wafuasi wake,” ameeleza Jaji Omotosho.
Hata hivyo, hakimu huyo amekataa ombi la mawakili wa serikali la kumpa Kanu adhabu ya kifo, akisema: “hukumu ya kifo duniani kote inakosolewa na jamii ya kimataifa, hivyo kutokana na hilo na kwa maslahi ya haki, naamuru mshtakiwa afungwe kifungo cha maisha jela.”
Ameongeza kuwa, licha ya kiburi alichoonyesha mshtakiwa na kutokuwa na majuto lakini lazima “achanganye haki na huruma.”
Mbali na hukumu ya kifungo cha maisha, kiongozi huyo wa Wabiafra wanaopigania kujitenga na Nigeria amehukumiwa pia kifungo cha jumla cha miaka 25 kwa mashtaka mawili, bila uwezekano wa kukata rufaa, yote yakiendana na hukumu ya kifungo cha maisha. Kanu ana muda wa siku 90 kukata rufaa dhidi ya hukumu ya kifungo cha maisha alichohukumiwa.
Kanu, ambaye amekuwa gerezani tangu alipokamatwa tena nchini Kenya mnamo mwaka 2021 na kurejeshwa Nigeria, amewalaumu mawakili wa serikali kwamba kurejeshwa kwake kinyume cha sheria kulipunguza uwezekano wa kupata hukumu ya haki.
Nnamdi Kanu aliendesha kampeni ya kufufua upya vuguvugu la Biafra, eneo lililowahi kujitenga kusini mashariki mwa Nigeria kati ya mwaka 1967 hadi 1970 na kusababisha vita vya wenyewe kwa wenyewe nchini humo vilivyosababisha vifo vya watu milioni tatu kabla ya wapiganaji wa eneo hilo kujisalimisha…/