Kamanda wa Jeshi la Nchi Kavu la Iran, akizungumza mbele ya makamanda wenzake, amesisitiza kuwa kwa kuzingatia maelekezo ya Kiongozi Muadhamu na kwa kutumia tajiriba ya vita vya zamani, hususan vita vya kulazimishwa vya siku 12 vya mwezi Juni, jeshi limeweka mkakati wa kuzingatia nguzo tano: utii wa uongozi, uadilifu, ufanisi, teknolojia na uboreshaji wa ujuzi.
Amesema kuwa, kwa kufuata nguzo hizi na maagizo ya uongozi, jeshi limejipanga kuongeza kasi ya harakati, kuimarisha ufanisi, kuwekeza katika rasilimali watu na kusasisha silaha pamoja na vifaa, ili kujibu tishio lolote jipya kwa kutegemea nguvu ya kiroho na teknolojia za kisasa.
Amesisitiza umuhimu wa kutumia nadharia za kisayansi na akili mnemba, na kuongeza kuwa Jeshi la Nchi Kavu la Iran limefikia kiwango cha juu cha uwezo wa kivita, likiwa na askari wenye imani, ari ya kujitolea, silaha za kisasa na tajiriba ya maveterani wa vita.
Kamanda alionya kuwa leo dunia inakabiliwa na vita vya kisaikolojia na vya mchanganyiko. Amesema maadui wa Jamhuri ya Kiislamu waliposhindwa kwa vita vya moja kwa moja, waliingia katika vita laini vya propaganda na upotoshaji. Amebaini kuwa, kwa msaada wa Mwenyezi Mungu, uongozi wa Kiongozi Muadhamu, mshikamano wa taifa na nguvu za kijeshi, mipango ya adui ilisambaratishwa.
Akikumbusha vita vya siku 12, alisema kuwa Jeshi la Nchi Kavu lilitumia vikosi 10 kwa ajili ya ulinzi wa mipaka, na lilitumia ndege zisizo na rubani aina ya Arash-1 na Arash-2 kushambulia maeneo yaliyokaliwa kwa mabavu ambayo yamepichikwa jina bandia la Israel. Aidha, jeshi liliweka mifumo ya ulinzi wa anga kwa ushirikiano na vikosi vya anga vya Jeshi la Walinzi wa Mapinduzi ya Kiislamu (IRGC). Kwa kutumia mifumo mipya ya ulinzi, jeshi liliweza kuangusha ndege zisizo na rubani za adui.