Marekani na Ukraine zimesema katika taarifa ya pamoja kwamba sasa zinaandaa “mpamgo wa amani ulioboreshwa” baada ya siku ya kwanza ya mazungumzo yanayofanyika huko Geneva, Uswisi yaliyoanza siku ya Jumapili.
Wakati huo huo viongozi wa nchi zinazounda “muungano wa washirika wanaoiunga mkono Ukraine” wanatarajiwa kutafanya mkutano kwa njia ya video siku ya Jumanne ambapo watayajadili mazungumzo hayo ya amani. hayo ni kwa mujibu wa Waziri Mkuu wa Uingereza Keir Stammer.
Kwa upande wake waziri wa Mambo ya Nje wa Ujerumani Johann Wadephul amesema mazungumzo kuhusu mpango wa amani ya Ukraine uliopendekezwa na Marekani unapaswa kuangaliwa kwa makini ili bara la Ulaya liweze pia kufaidika.
Wadephul amegusia juu ya masuala “yanayohusu Ulaya” ambayo amesema yameondolewa kwenye mpango huo, huku akisisitiza kwamba nchi za Umoja wa Ulaya na Ukraine lazima zihusishwe katika makubaliano yoyote ya amani.
Kansela wa Ujerumani Friedrich Merz pia amesisitiza katika mahojiano na DW kwamba uhuru wa Ukraine haupaswi kutolewa kafara kama sehemu ya mpango wa Marekani ambao Washington inataka ukubaliwe ifikapo Alhamis hii.
Kansela wa Ujerumani Friedrich Merz amesema kutokana na mazungumzo ya Geneva haoni kama kuna tamaa kwamba mafanikio yatapatikana wiki hii kuhusu makubaliano ya amani ya Ukraine, ameeleza kwamba huo ni mchakato mgumu. Maoni hayo ameyatoa baada ya wawakilishi wa Marekani, Ulaya na Ukraine kukutana kwa mazungumzo ya ngazi ya juu huko Geneva kujadili pendekezo jipya la amani la Marekani kuhusu kuukomesha mzozo wa Ukraine.
Washirika wa Ukraine kutoka nchi za Ulaya wameupinga mpango huo katika ngazi yake ya awali, ambao wanahisi kuwa Urusi inapendelewa sana.
Hati hiyo ya awali yenye pointi 28 inaitaka Ukraine iachie maeneo makubwa yaende kwa Urusi hatua itakayopunguza ukubwa wa jeshi lake, miongoni mwa hatua zingine.
Kansela wa Ujerumani, amesema ni lazima Urusi ishurutiswe kushiriki kwenye mchakato wa amani ya Ukraine.