Familia za wanafunzi waliotekwa nyara nchini Nigeria zimenasa kati ya matumaini na kukatishwa tamaa kutokana na vitendo vya kukaririwa vya utekaji nyara wanafunzi wakiwa mashuleni.
Ni baada ya wanafunzi 303 na walimu 12 kutekwa nyara na watu waliokuwa na silaha wasiojulikana likiwa tukio la pili kubwa kutokea ndani ya wiki moja, huku hofu za usalama zikiongezeka katika nchi hiyo yenye watu wengi zaidi barani Afrika.
Wanafunzi 50 kati ya zaidi ya 300 waliotekwa nyara kutoka Shule ya Kikatoliki ya St. Mary’s katika jimbo la Niger nchini Nigeria wametoroka na wameunganishwa na familia zao.
Juhudi za utafutaji na uokoaji zinaendelea ili kuokoa wanafunzi waliosalia huku wazazi wao wakihangaika huku na kule katika hali ya mfadhaiko na kukata tamaa.
“Walikuwa wakisafirishwa kwa miguu, kama wachungaji wanavyoswaga mifugo yao. Watu wenye silaha walikuwa kwenye baiskeli huku wakiwadhibiti wasichana,” amesema baba wa mvulana mmoja aliyetekwa nyara.
Hali ya uchanganyikiwa inaongezeka katika jumuiya ya eneo la Papiri.
“Kila mtu yuko kimya,” amesema mkazi mmoja wa eneo hilo na kuongeza: “Tunaitaka serikali ije haraka na kuwaokoa watoto wetu.”
Hadi saa hakuna kundi lilidai kuhusika na utekaji nyara huo.
Rais Tinubu anakabiliwa na mashinikizo baada ya karibu watu 400, zaidi ya 300 kati yao wakiwa wanafunzi, kutekwa nyara katika moja ya wimbi kubwa zaidi la utekaji nyara nchini humo katika siku za hivi karibuni.