Hazem Qassem, msemaji wa Harakati ya Mapambano ya Kiislamu ya Palestina (Hamas) huko Gaza, amesema kwamba ujumbe wa harakati hiyo umefanya mazungumzo na maafisa wa Misri huko Cairo kujadili awamu inayofuata ya makubaliano ya kusitisha mapigano.
Qassem amesisitiza kwamba mwelekeo wa awamu ya pili ya makubaliano ya kusitisha mapigano ni “mgumu,” akiongeza kuwa ujumbe wa harakati hiyo umeitaarifu Misri, kama mmoja wa wapatanishi, kwamba kuendelea ukiukaji wa mapatano ya kusitisha mapigano unaofanywa na Israel kunaweza kudhoofisha makubaliano hayo.
Msemaji wa Hamas amesema kwamba vikosi vya kimataifa vilivyopangwa kupelekwa Gaza vinapaswa kuwa na jukumu la kuwatenganisha Wapalestina na jeshi vamizi la Israel.
Ujumbe wa uongozi wa Hamas Jumapili iliyopita ulikutana mjini Cairo na mkuu wa ujasusi wa Misri, Hassan Rashad kujadili awamu ya pili ya utekelezaji makubaliano ya kusitisha mapigano katika Ukanda wa Gaza.
Kwa mujibu wa taarifa hiyo, Hamas imetangaza tena msimamo wake wa kuheshimu utekelezaji wa makubaliano hayo, ikisisitiza umuhimu wa “kusimamishwa uhalifu unaoendelea kufanywa na utawala wa Kizayuni, ambao unatishia kudhoofisha makubaliano hayo.
Ni vyema kukumbusha hapa kuwa, Shirika la Umoja wa Mataifa la Kuhudumia Wakimbizi wa Kipalestina (UNRWA) limetangaza kuwa sera ya Israel ya njaa ya kimuundo katika Ukanda wa Gaza bado inaendelea na kwamba ukosefu mkubwa wa rasilimali za kifedha umesababisha mgogoro wa binadamu katika eneo hilo kwa kiwango kisicho na kifani.