Katika ripoti yake iliyochapishwa Jumanne, Amnesty International imesema imekusanya ushahidi kutoka kwa watu 28 walionusurika ambao walielezea ukatikili huko El-Fasher kuanzia mauaji ya kushtukiza ya wanaume wasio na silaha hadi ubakaji wa wasichana na wanawake. Mkuu wa shirika la Amnesty International, Agnes Callamard amesema ukatili huo unaondelea na ulioenea dhidi ya raia, unaweza kuwa uhalifu wa kivita, na pia unaweza kuwa uhalifu mwingine chini ya sheria ya kimataifa.
Aidha, ametaka wale wote waliohusika wawajibishwe. Kulingana na Callamard uhalifu huo uliwezeshwa na Umoja wa Falme za Kiarabu, UAE kwa kuwaunga mkono wanamgambo wa RSF. Ametoa wito kwa jumuia ya kimataifa na Baraza la Usalama la Umoja wa Mataifa kuitaka UAE, kuacha kuwaunga mkono RSF.
Umoja wa Falme za Kiarabu wakanusha madai
UAE imekuwa ikishutumiwa sana kwa kuwapatia silaha, nguvu kazi na mafuta wanamgambo wa RSF. Lakini mara kwa mara Abu Dhabi imekuwa ikikanusha madai hayo, licha ya ushahidi uliotolewa na Umoja wa Mataifa na uchunguzi huru.
Ripoti ya Amnesty International imemtaja mmoja wa watu walionusurika kutoka El-Fasher, ambaye alisema yeye pamoja na binti yake mwenye umri wa miaka 14 walibakwa na wapiganaji wa RSF walipokuwa wakiukimbia mji huo. Shahidi mwengine amesema alishuhudia vikosi vya RSF vikiwaua watu ”kama nzi” na hakuna hata mmoja wa wale aliowaona wakiuawa ambaye alikuwa mwanajeshi mwenye silaha. Callamard anasema huku vita vikiendelea, hadithi za watu walionusurika zinaonyesha uthibitisho wa kushindwa kwa jumuia ya kimataifa kuisaidia Sudan kuumaliza mzozo wake.
Wakati huo huo, Mkuu wa RSF, Jenerali Mohamed Hamdan Dagalo amesema wanamgambo wake wataingia mara moja kwenye makubaliano ya kusitisha mapigano kwa miezi mitatu, ili kuruhusu huduma za kibinaadamu katika mgogoro wake na vikosi vya jeshi vya Sudan, baada ya jeshi hilo kuukataa mpango wa Marekani.
”Tuna matumaini kuwa nchi nne zitatekeleza jukumu lao katika kuushinikiza upande mwingine kushiriki katika hatua hii na juhudi za kimataifa zinazolenga kuyafikia maslahi ya watu wa Sudan,” alifafanua Jenerali Dagalo.
Jeshi la Sudan laukosoa mpango wa Marekani
Jenerali Dagalo ameitoa kauli hiyo baada ya Rais wa Marekani Donald Trump, wiki iliyopita kusema kuwa ataingilia kati kwa lengo la kujaribu kuvimaliza vita vya Sudan, ambavyo vimelitumbukiza taifa hilo katika baa la njaa. Mapema mwezi huu, Marekani, UAE, Misri na Saudi Arabia, zilipendekeza mpango wa kusitisha mapigano kwa miezi mitatu, ukifuatiwa na mazungumzo ya amani.
Hata hivyo, Mkuu wa Jeshi la Sudan Jenerali Abdel Fattah al-Burhan katika hotuba yake ya Jumapili alilikataa na kulikosoa pendekezo hilo la Marekani, akilitaja kuwa ”baya zaidi” na lisilokubalika. Kulingana na Jenerali al-Burhan, pendekezo hilo linalenga kulidhoofisha jeshi la Sudan, huku likiruhusu RSF kuendelea kudhibiti maeneo iliyoyanyakua.
(AFP, AP, Reuters)