Msemaji wa serikali ya muda ya Afghanistan inayoongozwa na Taliban Zabihullah Mujahid, amesema watoto tisa na mwanamke mmoja wameuawa baada ya vikosi vya jeshi la Pakistan kushambulia nyumba moja katika jimbo la Khost kusini mashariki mwa nchi hiyo.
Mujahid ameeleza katika taarifa aliyotoa jana Jumanne kwamba, shambulio hilo lilitokea usiku wa manane katika wilaya ya Gurbuz.
Katika ujumbe alioweka kwenye mtandao wa kijamii wa X, msemaji wa Taliban amesema: “vikosi vamizi vya Pakistan vimeripua nyumba ya raia wa eneo hilo, Waliat Khan, mwana wa Qazi Mir, na matokeo yake, watoto tisa (wavulana watano na wasichana wanne) na mwanamke mmoja wameuawa shahidi, na nyumba yake imebomelewa”.
Kwa mujibu wa Zabihullah Mujahid, mashambulizi mengine ya anga yamefanywa katika majimbo ya kaskazini-mashariki mwa Kunar na mashariki mwa Paktika na kuwajeruhi raia wasiopungua wanne.
Baadaye Jumanne hiyohiyo ya jana, msemaji wa jeshi la Pakistan Ahmad Sharif Chaudhry alitoa taarifa ya kukanusha madai ya serikali ya Afghanistan na kusema Pakistan haiwalengi na kuwaua raia.
Kanusho hilo lilitolewa baada ya Mujahid kusisitiza kwamba Afghanistan “itatoa jibu linalostahiki kwa wakati unaofaa”.
Shambulio hilo la hivi karibuni limeibua hatari ya uwezekano wa kuzuka mapigano mapya kati ya mataifa hayo mawili jirani wakati makubaliano dhaifu ya kusitisha mapigano yaliyofikiwa baina ya pande mbili yakiwa hatarini kuvunjika, huku kila upande ukimlaumu mwenzake kwa mkwamo uliojitokeza katika mazungumzo ya kutafuta suluhu.
Pakistan imekuwa ikiituhumu Afghanistan kwamba inawapa hifadhi magaidi wa Tehreek-e-Taliban ya Pakistan ambao inasema, wanafanya mashambulio dhidi ya vikosi vya jeshi la Pakistan kutokea ardhi ya Afghanistan. Hata hivyo serikali ya Taliban inakanusha tuhuma hiyo…/