KIUNGO mshambuliaji wa JKT Tanzania, Said Ndemla amesema ugumu na ubora wa Ligi Kuu Bara ni chachu kwao kukuza viwango vyao vya uchezaji huku akitaja sababu ya kuendelea kudumu kwenye soka kuwa ni kuhjitunza na anatamani kuona anaendelea kuwa bora zaidi ya alivyo sasa.
Akizungumza na Mwanaspoti, Ndemla amesema ligi kuu inakua msimu hadi msimu na ushindani umekuwa mkubwa kuanzia klabu hadi wachezaji hivyo anaamini baada ya miaka mitano Tanzania itaendelea kuwa bora na itaogopwa kimataifa.
“Ukitaka kufahamu kwa nini tupo nafasi ya nne kwa ubora Afrika angalia uwakilishi wa timu zetu kimataifa tunabebwa na timu nne hii ni wazi tunakua na tunatoa ushindani naamini baada ya miaka mitano timu ambazo zinaogopwa zitaanza kutuhofia hadi sisi,”
“Waarabu ambao ndio wanatajwa kuwa bora Afrika ni suala la muda tu kukutana na timu kutoka Bara na kupata ushindani kutoka kwetu hasa kwenye kutwaa mataji misimu minne nyuma timu zetu zilikuwa hazifanyi vizuri zikijkutana na timu kutoka Morocco sasa ni ushindani mkubwa.”
Akizungumzia ligi kwa jumla, Ndemla amesema ubora kila mmoja anauona msimu uliopita kuna utofauti mkubwa na msimu huu kila timu zimefanya sajili nzuri na zimewekeza hivyo wachezaji wanafanya kazi kama inavyotakiwa ushindani umekuwa mkubwa na ndiyo maana matokeo yanapatikana kwa ugumu siyo mteremko.
“Msimu huu ni mgumu zaidi ya misimu miwili nyuma hii inatusaidia wachezaji kujitengenezea mazingira ya ushindani wenyewe kwa wenyewe, pia hata kwa timu pinzani kutokana na kila mchezaji kutaka kupata nafasi ya kucheza, pia kuonyesha kwa nini amepata nafasi.”
Ndemla amesema kwa upande wake anakazi kubwa ya kufanya kuendelea kujiweka kwenye ushindani kutokana na ubora wa wachezaji waliopo JKT Tanzania kwenye nafasi anayocheza licha ya kuhudumu muda mrefu anakutana na changamoto ya damu changa ambazo pia zinapambana kujiweka kwenye nafasi nzuri.