Waziri wa Mambo ya Nje wa Jamhuri ya Kiislamu ya Iran, Sayyid Abbas Araghchi amesema, yanayoendelea kujiri katika eneo la Magharibi ya Asia ambayo ni vita vya kudumu, uchokozi wa kivamizi, mauaji ya kimbari na kujipanua kikoloni utawala wa kizayuni wa Israel, ni matokeo ya moja kwa moja ya uungaji mkono wa Marekani na uridhishaji unaofanywa na baadhi ya nchi za Ulaya kwa utawala huo haramu.
Araghchi ameeleza hayo alipohutubia mkutano wa 30 wa Nchi Wanachama wa Mkataba wa Kupiga Marufuku Silaha za Kemikali (OPCW) uliofanyika The Hague, Uholanzi, ambapo pamoja na mambo mengine, alibainisha maoni na mitazamo ya Jamhuri ya Kiislamu ya Iran, ikiwa ni mmoja wa waathirika wa silaha hizo za maangamizi ya umati.
Waziri wa Mambo ya Nje wa Iran amesema, Mkataba wa Kupiga Marufuku Silaha za Kemikali ulipitishwa kwa lengo maalumu na lililo wazi kabisa, ambalo ni kuzuia kurudiwa tena matumizi ya kutisha na kuogofya ya silaha hizo za maangamizi ya halaiki; na akabainisha kwamba, Mkataba wa OPCW inapasa uendelee kutekeleza masuulia uliyonayo bila ya kuandamwa na aina yoyote ya ushawishi, matashi ya kisiasa na mashinikizo; na hadi sasa, utawala wa Israel ungali ndio kikwazo pekee cha kuwa na Asia Magharibi isiyo na silaha za maangamizi ya halaiki.
Araghchi ameongezea kwa kusema, Jamhuri ya Kiislamu ya Iran imeshaeleza mara kadhaa na kupitia duru rasmi wasiwasi ilionao kuhusu namna Marekani isivyofuata au inavyochelewa kutekeleza majukumu iliyonayo katika Mkataba wa OPCW.
Waziri wa Mambo ya Nje wa Iran amesema, Marekani ingali inaendelea kutengeneza silaha za kemikali zisizoua; na kwa mujibu wa vyanzo vyake rasmi, hivi sasa inatekeleza miradi ya kuzigeuza kuwa silaha, mada zinazoathiri akili na vitu vinavyotokana na mihadarati bandia.
Katika hotuba yake hiyo, Araghchi amebainisha kuwa, Umoja wa Mataifa, malengo na misingi yake mikuu inaandamwa na hujuma na mashambulizi; na akasema, kifungu cha 2 na ibara ya 4 ya Mkataba, ambayo inajulikana kama hakikisho kuu la “uokozi wa vizazi vijavyo kutokana na janga la vita,” inakiukwa kila mara; na baya zaidi ni kwamba, ukiukwaji huo sasa unafanywa kuwa jambo la kawaida.
Marekani na utawala wa Kizayuni zimezidisha hali ya kutoaminiana na ushindani wa uundaji silaha katika eneo la Asia Magharibi kutokana na kutojali kwao mikataba ya kimataifa, huku zikiendeleza au kudumisha uwezo wao wa kumiliki silaha za mauaji ya halaiki. Mwenendo huu umekuwa sababu ya kukosekana uthabiti na utulivu, kuongezeka mivutano ya kiusalama, na kudhoofika juhudi za kuwa na eneo lisilo na silaha za maangamizi ya umati.
Marekani na utawala wa Kizayuni zinashutumiwa kwa kutotekeleza kikamilifu majukumu yao kulingana na Mkataba wa Kupiga Marufuku Silaha za Kemikali na za Nyuklia. Utawala wa Israel umekataa pia hadi sasa kujiunga na Mkataba wa Kupiga Marufuku Uenezaji Silaha za Nyuklia (NPT) na umeficha maghala yake ya silaha hizo angamizi.
Mashambulizi ya utawala wa kizayuni dhidi ya nchi za eneo hili, ikiwa ni pamoja na hujuma ya hivi karibuni dhidi ya Qatar, hayajasababisha maafa ya kibinadamu tu na kiusalama, lakini yamedhoofisha pia nafasi ya Marekani inayotazamwa kama mdhamini wa usalama wa waitifaki wake katika eneo hili. Vitendo hivi vimezusha wimbi la mvurugiko wa uthabiti na utulivu katika Asia Magharibi. Na ili kukabiliana na vitisho hivyo, nchi za eneo kwa upande wao zimeamua kufuata mkondo wa kuimarisha uwezo wao wa kijeshi na wa uzuiaji hujuma.
Ukweli ni kwamba, upuuzaji unaofanywa na Marekani na utawala wa kizayuni katika kutekeleza mikataba ya kimataifa unautia doa na shaka uhalali wa taasisi za kimataifa kama vile Mkataba wa Silaha za Kemikali (OPCW) na Mkataba wa Silaha za Nyuklia (NPT). Utumiaji au utoaji vitisho vya kutumia silaha za maangamizi ya halaiki unahatarisha mno usalama wa raia. Ukiwa ndio mmiliki pekee wa silaha za nyuklia katika Asia Magharibi, utawala wa kizayuni ndio kikwazo kikuu cha kufikiwa lengo muhimu la kuhakikisha eneo hili haliwi na silaha yoyote ya maangamizi ya umati…/