Waziri wa Mambo ya Nje wa Iran amesema kuwa, Tehran itaendelea kuwa muwazi kuhusu mazungumzo, na msimamo wake utaendelea kuwa ule ule kwamba mazungumzo maana yake ni mazungumzo, si udikteta. Inaweza kufikiria kufanya mazungumzo na Marekani, lakini tu ikiwa Washington itabadilika na kuacha madai yake yasiyo na mantiki. Iingie kwenye mazungumzo ya kuheshimiana na ya usawa si ya kufanyiana udikteta.
Sayyid Abbas Araghchi amesema hayo katika mahojiano maalumu aliyofanywa na televisheni ya France 24 mjini Paris Ufaransa na kusisitiza kwa kusema: “Mazungumzo maana yake ni mazungumzo, si kutoa amri, na tunakataa chochote kinachotolewa kwa amri na udikteta.”
Aidha Waziri wa Mambo ya Nje wa Iran amejibu swali la mwandishi wa televisheni ya France 24 akisema: “Sababu iko wazi: Hakuna utashi wa mazungumzo ya kweli na ya haki nchini Marekani.”
Vilevile amesema kuwa, Iran tayari ilikuwa imethibitisha kujitolea kwake kuheshimu njia za kidiplomasia, lakini Marekani na utawala wa Kizayuni walipuuza nia hiyo njema ya Iran na kuanzisha vita dhidi yake.
Aidha amesema, Iran iko tayari kwa mazungumzo halisi na ya nia njema, na inakataa makubaliano ya kushurutishwa na kubebeshwa bila ya utashi wake.
Waziri wa Mambo ya Nje wa Iran amesema pia kuwa, Jamhuri ya Kiislamu ilishikiri kwenye mazungumzo kati yake na madola ya dunia mazungumzo ambayo yaliishia kwenye kufikiwa makubaliano ya nyuklia ya JCPOA mwaka 2015 lakini ni rais wa Marekani Donald Trump ndiye aliyejitokeza hadharani na kuyachana makubaliano hayo.
Pamoja na yote hayo, Waziri Araghchi amesema kuwa, msimamo wa Tehran si kukataa diplomasia, bali ni kupinga mazungumzo ya kidikteta na makubaliano ya kulazimishwa.
“Siku ambayo serikali ya Marekani itatangaza kwamba iko tayari kuweka kando madai yake yasiyo na mantiki na kufanya mazungumzo mazito, yenye manufaa kwa pande zote yanayotegemea maslahi ya pande zote mbili, Iran kamwe haitosema hapana,” amesema.