MBIVU na mbichi ya safu mpya ya uongozi ya Bodi ya Ligi (TPLB) itajulikana kesho Jumamosi, Novemba 29, wakati Mkutano Mkuu wa 12 wa Baraza Kuu la bodi hiyo utakapofanyika jijini Dar es Salaam ukiambatana na Uchaguzi Mkuu.
Mkutano huo unaotarajiwa kufanyika kuanzia saa 2:00 asubuhi kwenye Ukumbi wa Hoteli ya Golden Tulip utaambatana na uchaguzi huo wa kupata uongozi mpya wa bodi ikiwamo nafasi ya uenyekiti iliyoachwa wazi na mwenyekiti wa zamani wa Coastal Union, Steven Mnguto.
Mnguto alijiuzulu nafasi hiyo Juni mwaka huu kutokana na sakata lililohusiana na Dabi ya Kariakoo na nafasi hiyo ilikuwa ikikaimiwa na Makamu Mwenyekiti wa Bodi hiyo ambaye ni Rais wa Klabu ya Azam, Idrisa Nassor ‘Father’ aliyejitosa kuwania kiti akichuana na Hoseah Lugano.
Kwa mujibu wa taarifa iliyotolewa na Kamati ya Uchaguzi Mkuu ya Shirikisho la Soka Tanzania (TFF) iliyosainiwa na Mwenyekiti wake, Wakili Kiomoni Kibamba ni kwamba mbali na nafasi hiyo ya uenyekiti, pia uchaguzi huo utahusisha nafasi ya Makamu ya Mwenyekiti na Wajumbe wa Kamati ya Uongozi wa Bodi hiyo.
Mchakato wa uchaguzi huo ulianza tangu Oktoba mwaka huu na usaili ulifanyika Oktoba 15 na kushuhudiwa wagombea hao mawili kati ya matatu yaliyojitokeza kuwania nafasi ya uenyekiti yakipenya baada ya Said Soud kuenguliwa kwa kukosa sifa kwa mujibu wa kanuni namba 9:7.
Katika nafasi ya Makamu Mwenyekiti, ina mgombea mmoja tu, Hassan Muhsin aliyepenya baada ya Kheri Missinga kushindwa kuhudhuria usaili huo, huku nafasi ya Mjumbe Mwakilishi wa Klabu za Ligi Kuu ikiwa na wagombea wawili, Japhet Makau na Gilbert Nkoronko. Kwa upande wa Wagombea na Ujumbe wa Klabu za Championship pia ina wagombea wawili, Hillary Ndumbaro na Wazir Gao, ilihali kwa klabu za First League yupo mgombea mmoja tu, Azimkhan Akber.
Katika safu ya Bodi ya Ligi iliyokuwa chini ya Mnguto na Idrissa, baadhi ya wagombea waliojitosa katika uchaguzi huo wa mwaka huu kama Ndumbaro, Makau, Akber na Missinga walikuwa sehemu ya bodi hiyo inayomaliza muda wake.