Baraza la Waislamu la Ufaransa limetoa wito kwa serikali kuanzisha uchunguzi kuhusu madai kwamba watu wawili walikusanya taarifa kuhusu Waislamu nchini Ufaransa na kuzikabidhi kwa shirika la ujasusi la Israel.
Taarifa iliyotolewa jana Ijumaa ilisema, baraza hilo limeashiria madai kuhusu uchunguzi uliofanywa dhidi ya Waislamu nchini Ufaransa, kwa ombi la Baraza la Wawakilishi wa Taasisi za Kiyahudi nchini humo.
Kwa mujibu wa madai hayo, vyombo vya kisiasa, kiutawala na kiusalama nchini Ufaransa vilitoa taarifa kuhusiana na suala hilo kwa watu wawili, mmoja wao akiwa Mwisraeli, na kisha zikatumwa kwa mashirika ya ujasusi ya dola la kigeni.
Ripoti za kufanyika ujasusi dhidi ya Waislamu nchini Ufaransa kwa maslahi ya Israel zilionekana katika video inayosambaa kwenye mitandao ya kijamii, ambapo mwandishi wa Ufaransa, Didier Long anasema kwamba tangu 2023 amekuwa akifanya utafiti kwa maslahi ya Baraza la Wawakilishi la Taasisi za Kiyahudi nchini Ufaransa na taasisi mbalimbali za Kiyahudi nchini, kwa ushirikiano na Dov Maimon, ambaye anafanya kazi kama mshauri wa serikali ya Israel.
Long amesema alikutana na watu wa aina mbalimbali, wakiwemo maafisa wa huduma ya ujasusi wa ndani ya Ufaransa na Kurugenzi ya Ujasusi wa Kijeshi, na kwamba taarifa alizokusanya ziliwasilishwa katika ripoti kwa mashirika ya ujasusi ya Israel.
Kwa mujibu wa Baraza la Waislamu nchini Ufaransa, Long na Maimon wanawaona Waislamu nchini Ufaransa kama “tishio” kwa Wayahudi wanaoishi nchini humo.
Baraza hilo limetoa wito kwa mamlaka husika, hasa Wizara ya Mambo ya Ndani, kuanzisha uchunguzi rasmi kuhusu madai haya.
Pia limetangaza kwamba litawasilisha malalamiko kwa Tume ya Taifa ya Taarifa na Uhuru kuhusu taarifa zilizokusanywa na kutumiwa.