Serikali ya Peru imetangaza hali ya hatari Ijumaa jioni, Novemba 28, kwenye mpaka wake na Chile na kutangaza kuwa itatuma wanajeshi kuimarisha udhibiti, ikihofia wimbi la wahamiaji wanaokimbia uchaguzi unaowezekana wa rais wa mrengo wa kulia.
Imechapishwa: Imehaririwa:
Dakika 1 Wakati wa kusoma
Matangazo ya kibiashara
Hatua hii itatekelezwa katika eneo la kusini la Tacna kwa siku 60, ikitarajia ushindi unaowezekana wa mgombea wa mrengo wa kulia nchini Chile Jose Antonio Kast katika uchaguzi wa urais, ambapo ameahidi kuwafukuza wahamiaji wasio na vibali.
“Polisi wa Peru watadumisha utulivu, kwa usaidizi wa vikosi vya jeshi,” agizo la serikali linasema. Takriban wanajeshi hamsini watatumwa “mara moja,” Waziri wa Mambo ya Ndani wa Peru Vicente Tiburcio amesema, akiongeza kuwa wengine hamsini watajiunga nao mapema mwezi Desemba.
“Tunaogopa watatufukuza kwa nguvu”
Video iliyorushwa na gavana wa eneo la mpaka la Arica, kaskazini mwa Chile, inaonyesha watu kadhaa wakijaribu kufika Peru katika kivuko cha mpaka cha Chacalluta-Santa Rosa.
“Hawataki kuturuhusu kuingia Peru… tunaogopa watatufukuza kwa nguvu” kutoka Chile, mhamiaji kutoka Venezuela amekiambia chombo cha habari cha mtandaoni cha The Clinic kwa sharti la kutotajwa jina.
Kituo cha redio cha Peru, Radio Tacna, kimetangaza picha za watu wakiwa wamebeba watoto karibu na kivuko cha mpaka.
“Kumekuwa na mkusanyiko wa wahamiaji wanaotaka kuondoka nchini ambao wamekumbana na matatizo ya kuingia Peru,” Waziri wa Usalama Luis Cordero amewawaambia waandishi wa habari, bila kutaja idadi ya watu waliohusika.