Dar es Salaam. Viongozi wa Chama cha Demokrasia na Maendeleo (Chadema), wakiwamo Makamu Mwenyekiti – Bara, John Heche na Katibu Mkuu, John Mnyika, wamepangua shauri la madai ya kuidharau Mahakama lililokuwa likiwakabili.
Heche na wenzake walikuwa wakikabiliwa na shauri hilo Mahakama Kuu Masjala Ndogo Dar es Salaam, lililofunguliwa na Makamu Mwenyekiti mstaafu wa Chadema, Zanzibar, Said Issa Mohamed na wajumbe wa Bodi ya Wadhamini wa chama hicho – Ahmed Rashid Khamis na Maulida Anna Komu.
Mbali ya Heche na Mnyika, wajibu maombi wengine walikuwa Rose Mayemba (mjumbe wa Kamati Kuu), Brenda Rupia (Mkurugenzi wa Mawasiliano na Uenezi), Gervas Lyenda (Mkuu wa Idara ya Habari), Hilda Newton na Twaha Mwaipaya (wanachama) na Bodi ya Wadhamini wa Chadema.
Shauri hilo la madai mchanganyiko namba 25480 la mwaka 2025, lilitokana na kesi ya madai iliyofunguliwa awali na waombaji hao dhidi ya Bodi ya Wadhamini wa Chadema na katibu mkuu wa chama hicho, kuhusu “mgawanyo usio sawa wa rasilimali kati ya Tanzania Bara na Zanzibar.”
Wakati shauri hilo likiendelea, chama hicho kilizuwa kufanya shughuli za kisiasa na kutumia mali za chama mpaka kesi hiyo itakapomalizika, zuio ambalo wadaiwa wanadaiwa kulikiuka na hivyo wakafunguliwa kesi ya hiyo mpya.
Mahakama imetupilia mbali shauri hilo kwa sababu za kiufundi pasipo kusikiliza hoja za msingi za madai ya walalamikaji. Uamuzi huo unatokana na pingamizi la awali kuhusu uhalali wa kisheria wa uwepo wa shauri hilo mahakamani.
Mahakama katika uamuzi uliotolewa leo Ijumaa, Novemba 28, 2025 na Jaji Awamu Mbagwa, imekubali sababu moja kati ya tatu za pingamizi hilo, kwamba lilifunguliwa nje ya muda uliowekwa na sheria.
Wakati wa usikilizwaji, Wakili Hekima Mwasipu alidai shauri liliwasilishwa nje ya muda wa siku 60 kinyume cha kifungu cha 3 cha Sheria ya Ukomo wa Muda, hivyo mahakama haina nguvu ya kisheria kulisikiliza.
Akijibu hoja hiyo, Wakili wa waombaji, Shaban Marijani aliipinga akidai matendo yanayolalamikiwa yalitokea kwa nyakati tofauti kwa kujirudia, akaiomba mahakama izingatie kifungu cha 7 cha Sheria ya Ukomo wa Muda, ili kuona yamewasilishwa ndani ya muda.
Jaji Mbagwa baada ya kupitia hoja za pande zote, katika uamuzi amesema kwa mujibu wa kiapo kilichounga mkono maombi hayo, matendo yanayolalamikiwa yalifanyika Juni 16 na 17, 2025.
Amesema shauri hilo lilifunguliwa mahakamani Oktoba 3, 2025 muda wa zaidi ya siku 100.
“Sheria inasema maombi haya yanapaswa kuletwa ndani ya siku 60. Kutokana na hayo kisheria maombi haya yaliletwa nje ya muda unaotakiwa,” amesema.
Jaji Mbagwa amesema ukomo wa muda hauna huruma na ili mtu apate huduma za Mahakama, anapaswa awasilishe shauri kama hilo ndani ya muda. Kuchelewa hata kama ni siku moja kunamnyima haki hiyo.
“Ninaona pingamizi la wakili Mwasipu kuhusu ukomo wa muda ni la msingi, hivyo ninalikubali. Kutokana na kukubaliana na pingamizi hili, maombi haya yanatupiliwa mbali,” amesema.
Amesema kulingana na mazingira ya shauri hilo, kila upande utabeba gharama zake.
Kesi ya msingi
Licha ya shauri hilo kutupya, kesi ya msingi inaendelea mahakamani hapo chini ya Jaji Hamidu Mwanga.
Katika kesi hiyo ya madai, inadaiwa kumekuwa na mgawanyo usio sawa wa mali za Chadema na rasilimali fedha kati ya Tanzania Bara na Zanzibar kinyume cha Sheria ya Vyama vya Siasa na katiba ya chama hicho.
Pia wanadai kuna ubaguzi wa kidini na kijinsia na kutoa maoni na matamko yaliyo na nia ya kuvuruga muungano kati ya pande mbili za Jamhuri ya Muungano wa Tanzania.
Wanaiomba mahakama itamke kuwa wadaiwa wamekiuka kifungu cha 6A(1), (2), (5) cha Sheria ya Vyama vya Siasa, Sura ya 258 Marejeo ya mwaka 2019 na iwaelekeze wazingatie kifungu hicho.
Mbali ya hilo, wanaiomba itamke kwamba ugawaji wa fedha, mali na rasilimali kwa ajili ya shughuli za kisiasa na kiutawala kati ya Tanzania Bara na Zanzibar unaofanywa na wadaiwa ni kinyume cha sheria ni batili.
Vilevile, wanaomba mahakama isitishe kwa muda shughuli zote za kisiasa mpaka maagizo ya Mahakama yatakapotekelezwa, na zuio la kudumu dhidi ya matumizi ya mali, fedha na rasilimali za chama hadi walalamikiwa watakapotekeleza matakwa ya sheria husika na gharama za kesi.
Wadai pia walifungua shauri dogo la maombi ya zuio la muda dhidi ya wadaiwa, wakiiomba mahakama itoe amri kuwazuia kufanya shughuli zozote za kisiasa na kutumia mali za chama mpaka kesi hiyo ya msingi itakapoamuliwa, ambalo Juni 10, 2025 mahakama ililkubali hoja za walalamikaji na ikatoa amri ya zuio kama walivyoomba.