Dar es Salaam. Tanzania imewaeleza washirika wake wa kimataifa kuwa itaendeleza kwa nguvu mpya ushirikiano wa kidiplomasia, ikiwa ni sehemu ya mwelekeo wa Serikali mpya baada ya Uchaguzi Mkuu wa Oktoba 2025.
Kauli hiyo imetolewa leo Ijumaa Novemba 28, 2025 na Waziri wa Mambo ya Nje na Ushirikiano wa Afrika Mashariki, Balozi Mahmoud Thabit Kombo, alipokutana na jumuiya ya wanadiplomasia wanaowakilisha mataifa na taasisi mbalimbali za kimataifa nchini.
Kwa mujibu wa Taarifa iliyotolewa na kitengo cha mawasiliano ya Serikali, mkutano huo, ukiwa wa kwanza kufanyika tangu kuundwa kwa Serikali ya awamu ya sita kipindi chake cha pili, umehudhuriwa na mabalozi na wakuu wa mashirika ya kimataifa, ambao wameeleza dhamira yao ya kuendelea kushirikiana na Tanzania katika kujenga uchumi, kuimarisha taasisi na kuendeleza misingi ya amani.
Taarifa imefafanua kuwa Waziri Kombo amesema uthibitisho huo wa mabalozi ni ishara ya ukomavu wa diplomasia ya Tanzania na uhusiano imara na washirika wake wa maendeleo.
Kwa mujibu wa taarifa hiyo, Waziri Kombo amewapatia mabalozi taarifa kuhusu uchaguzi wa Oktoba 29 na matukio yaliyofuata, zikiwemo vurugu zilizoripotiwa katika maeneo mbalimbali nchini.
“Serikali ilichukua hatua za haraka kurejesha utulivu, kulinda maisha na mali za wananchi na kuhakikisha huduma za miundombinu pamoja na shughuli za kiuchumi zinaendelea bila kusimama,” amesema Waziri Kombo kwa mujibu wa taarifa hiyo.
Aidha, amewafahamisha wanadiplomasia hao kuhusu Tume ya Uchunguzi iliyoundwa na Rais Samia Suluhu Hassan kwa lengo la kusaka chanzo cha matukio hayo na kutoa mapendekezo ya hatua za kuimarisha mifumo ili kuzuia yajirudie.
Sambamba na hayo, Waziri Kombo amewaeleza wanadiplomasia hao kuwa Taifa limepitia kipindi kigumu ambacho hakijawahi kushuhudiwa katika historia yake, lakini sasa Serikali inaongoza juhudi za kuliponya taifa, kuimarisha mshikamano na kuhakikisha majadiliano na uwajibikaji vinapewa kipaumbele.
Waziri pia ametoa wito kwa wadau wa kimataifa kutoa fursa kwa Tanzania kukamilisha uchunguzi wake bila shinikizo, akionya kuwa matamko yanayotolewa na baadhi ya taasisi yanaweza kupotosha au kuathiri muktadha wa uchunguzi wa hali halisi iliyotokea na athari zake.
Wito huo wa Waziri Kombo unakuja wakati ambao, Tanzania imekuwa ikikabiliwa na shinikizo kutoka katika taasisi, mataifa na jumuiya mbalimbali za kimataifa zikitoa matamko na zingine zikijaribu kutoa maelekezo kwa serikali nchini kuhusu hatua za kuchukua kufuatia ghasia za uchuguzi wa Oktoba 29, 2025.
Moja ya shinikizo la hivi karibuni, ni maazimio ya Bunge la Umoja wa Ulaya, ambalo limetolewa wiki hii, likitoa msimamo wa kuzuia ufadhili kwa Tanzania kutokana na hali ya kisiasa nchini iliyotokana na ghasia za uchuguzi huo.
Akizungumzia maazimio ya bunge hilo, Waziri Kombo amesema Serikali imechukua hatua za kidiplomasia kuendelea na mashauriano na taasisi za Umoja wa Ulaya, ili kuimarisha uhusiano na kuendeleza masilahi ya pamoja baina ya Tanzania na mataifa hayo.
“Tanzania imefuatilia maazimio ya Bunge la Ulaya na kwamba imemwelekeza Balozi wa Tanzania mjini Brussels kuendelea na mashauriano ya kidiplomasia na taasisi za Umoja wa Ulaya na wadau husika, ili kuimarisha uhusiano na kuendeleza masilahi ya pamoja yanayolenga amani na ushirikiano,” imefafanua taarifa hiyo.