Arusha. Mkuu wa Jeshi la Polisi (IGP), Camillus Wambura amesema kuanzishwa kwa Chama cha Kuweka na Kukopa cha Usalama wa Raia (Ura Saccos), kutawaepusha watendaji wa jeshi hilo kushawishika kujiingia kwenye vitendo vya rushwa au uvunjifu wa maadili.
Aidha, amesema kumeongeza ufanisi na utendaji kazi wa polisi ambapo kupitia huduma mbalimbali za kifedha ikiwemo mikopo ikisaidia kuboresha ustawi wao kiuchumi.
Hayo yamesemwa leo Ijumaa Novemba 28, 2025 na Kamishna wa Fedha na Lojistiki, CP Liberatus Sabas, kwa niaba ya IGP Wambura, wakati wa ufunguzi wa mkutano mkuu wa 17 wa Ura Saccos, unaofanyika jijini Arusha.
Amesema kuwa lengo la kuanzishwa kwa ushirika huo mwaka 2006 ni huduma za kifedha kwa watendaji wa Jeshi la Polisi ikiwemo mikopo yenye masharti nafuu ili kuboresha ustawi wao kiuchumi na kurahisisha utendaji kazi na kuongeza ufanisi na morali ya utendaji kazi.
Amesema umoja huo unawasaidia wao kama watumishi wa jeshi hilo ili kuwekeza katika shughuli za maendeleo, kuanzisha miradi na kuwa watumishi wakiwa na maisha mazuri watafanya kazi ya kuwahudumia Watanzania kwa kuhakikisha amani, utulivu na usalama unaimarika.
“Askari kama hana changamoto kiuchumi, anafanya kazi vizuri, familia yake inamhesimu, heshima kwenye umaskini huwa haipo, tutahakikisha vijana wetu wanaendelea kupata mikopo wawe na maisha mazuri kwani akili zilizotulia zitafanya kazi vizuri na kutimiza wajibu wao kwa kuahkikisha amani, utulivu na sualama unakuwepo.
“Hii inawaepusha watendaji wa Jeshi la Polisi kushawishika kujiingiza kwenye vitendo vya rushwa au uvunjifu wa maadili pindi wanapokabuliwa na mahitaji ya fedha kwa ajili ya maendeleo yao,” amesema CP Sabas na kuongeza:
“Ura Saccos imejenga umoja wa kweli miongoni mwa askari, imeonyesha kuwa maendeleo ya mtu mmoja yanategemea mafanikio ya wote. Nimejulishwa kuwa mwaka 2026 Ura Saccos inatarajia kaudhimisha miaka 20 tangu kuanzishwa kwake ni historia inayoonyesha nidhamu ya utunzaji wa fedha, matumizi sahihi, uaminifu na kujituma kwa weledi.”
Kamishna huyo amewataka wanachama wa umoja huo kuweka akiba na kurejesha mikopo yao kwa wakati na kulinda taswira ya chama kwa kuzingatia katiba ili kuendelea kukua na kuimarika kiuchumi.
Awali, Mwenyekiti wa Bodi ya Ura Saccos, Kamishna wa Polisi Jamii, CP Faustine Shilogile amesema chama hicho kilichoanzishwa mwaka 2006 kilikuwa na wanachama 4,300 ila hadi Oktoba 31, 2025 wanachama wameongezeka hadi kufikia 51,838.
Kuhusu ukuaji wa uchumi na huduma za kifedha, amesema akiba za wanachama zimeongezeka hadi kufikia Sh139 bilioni ikiwa ni ongezeko la asilimia 7.4 toka mwaka 2024.
Amesema kwa kipindi cha Januari Mosi 2025 hadi Oktoba 31, 2025 mikopo 15,714 yenye thamani ya Sh108.3 bilioni imetolewa kwa wanachama.
“Mkutano huu ni mwendelezo wa mikutano ambayo imekuwa ikifanyika kila mwaka kwa lengo la kuimarisha utendaji na ufanisi wa chama chetu, tunajadiliana na kuyoka mafunzo na maendeleo ya chama,” amesema.
Mwenyekiti huyo amesema chama hicho kwa mwaka wa tisa mfululizo kimepata hati safi kutoka kwa mkaguzi wa nje COASCO na kuendelea kupata tuzo ya chama bora cha kuweka akiba na mikopo kwa mwaka wa tano mfululizo.
“Taarifa ya utendaji wa Saccos kwa mwaka 2024 iliyotolewa na Tume ya Maendeleo ya Ushirika nchini, Septemba 29, 2025 imeonyesha chama chetu kinaongeza kwa mtaji, mali na idadi ya wanachama kwa Saccoc zote nchini,” ameongeza.
Mrajisi Msaidizi wa Vyama vya Ushirika Mkoa wa Dar es Salaam, Anjela Nalimi ameipongeza Saccos hiyo kwa kuendelea kujitanua na kuigusa jamii na kuwa imeendelea kuwa Saccos bora kutokana na usimamizi thabiti pamoja na kufungua fungamano ambapo wenza wa wanachama na askari wastaafu wanaweza kujiunga nao.