Dodoma. Serikali imewataka wahitimu wa vyuo vikuu kuonyesha mfano wa moyo wa uzalendo katika nchi yao ili wengine waige.
Wito huo umetolewa leo Ijumaa Novemba 28, 2025 na Naibu Waziri wa Fedha, Mshamu Munde wakati akihutubia kwenye mahafali ya 39 ya Chuo cha Mipango na Maendeleo Vijijini (IRDP).
Munde alikwenda kumwakilisha Waziri wa Fedha, Balozi Hamisi Mussa Omary ambapo amesema uzalendo wa kwanza unatakiwa kuanzia kwa wasomi.
Naibu Waziri amesema sehemu kubwa ya wahitimu ni vijana ambao Taifa linawatazama kwa jicho la pekee na kipaumbele kwani ndiyo nguvu kazi.
Amewataka vijana waliomaliza mafunzo yao Chuo cha Mipango kuwa wa kwanza kwenye mifano hiyo lakini akasisitiza nidhamu na maadili kwa wanamipango hao.
“Serikali imewapa kipaumbele cha pekee ninyi mliotoka Mipango hasa kwenye uadilifu katika maeneo ambayo mtakwenda kufanya kazi, lakini kwa nidhamu yenu nendeni mkachangamkie fursa zilizopo,” amesema Munde.
Naibu Waziri amezungumzia mikopo kwa ajili ya mitaji kwa vijana akisema hadi sasa Serikali imeshatoa Sh130 bilioni vijana tangu kurejea kwa asilimia 10 za fedha za mikopo ya halmashauri.
“Fedha hizo siyo msaada, muhimu zirejeshwe ili tija ipatikane, hivyo tunasisitiza vijana kujitokeza na hata wanaokuza bunifu zao,” amesema.
Awali, Mkuu wa Chuo cha Mipango, Profesa Hozen Mayaya amesema jumla ya programu 40 zinafundishwa chuoni hapo kukidhi mahitaji ya soko la ajira.
Mkuu wa Chuo amesema katika mahafali ya 39, jumla ya wanafunzi 5721 wamehitimu masomo yao katika ngazi mbalimbali kuanzia Astashahada hadi Shahada ya Uzamili ambapo wanaume ni 2,594 na wanawake wapo 3,127.
Profesa Mayaya amesema katika kipindi cha mwaka wa masomo 2024/25 waliandaa mitaala mipya 10 na imepitishwa na Baraza la Taifa na Ufundi na Elimu ya Mafunzo ya Ufundi (Nactvet) ambayo inalenga kwenye soko jipya la ajira.
Akitoa neno la shukrani mmoja wa wahitimu Shida Moni amesema mafunzo waliyopata chuoni hapo na yale ya vitendo kutoka katika baadhi ya Taasisi ni nguzo na mhimili katika ubora wa utoaji wa huduma kwa Jamii.
Shida ameomba Serikali kuiamini kada ya Mipango na Maendeleo Vijijini kwani ndiyo injini inayowezesha uchumi wa Taifa kwa kuwa kila kila kinakwenda vizuri kikipangwa.