AZAM haina raha! Imeingia hatua ya makundi ya Kombe la Shirikisho Afrika kwa mguu mbaya ikiwa ni mara ya kwanza kufuzu katika historia yake huku ikiambulia vipigo viwili mfululizo.
Jana Ijumaa, ilichapwa bao 1-0 ikiwa nyumbani kwenye Uwanja wa New Amaan, Zanzibar dhidi ya Wydad Athletic ya Morocco. Matokeo hayo yanakuja baada ya Azam kupoteza mechi ya kwanza ya Kundi B ugenini ilikochapwa mabao 2-0 na AS Maniema Union ya DR Congo.
Kipigo hicho cha juzi, kimekuwa kilio si tu kwa wachezaji, bali hata benchi la ufundi la Azam linaloongozwa na kocha Florent Ibenge, raia wa DR Congo.
Ibenge aliyeipa RS Berkane ubingwa wa Kombe la Shirikisho Afrika msimu wa 2021-2022, amesema licha ya uzoefu alionao na mashindano ya kimataifa, lakini kikosi chake kinakosa wachezaji wengi wenye uzoefu ingawa anaona kuna hali ya kuimarika uchezaji wao, hivyo wana kila sababu ya kurekebisha mambo ili kufanya vizuri katika mechi nne zilizobaki.
Mbali na hilo, Ibenge amewapongeza wachezaji wa Azam kwa namna walivyopambana kusaka matokeo mazuri, na suala la kushindwa kutumia vizuri wanakwenda kulifanyia kazi.
“Ukiangalia leo (juzi) wachezaji wangu wamekimbia sana uwanjani, tofauti kabisa na mchezo wa kwanza, tulichokosa ni kutengeneza mabao lakini tumejifunza,” alisema Ibenge.
“Ni kweli nina uzoefu mkubwa kwenye mashindano haya ya Afrika, lakini nina wachezaji wengi ambao wanaona joto la mashindano kama haya kuna kitu wanakipata.
“Tulikuwa tunatengeneza nafasi, hatukuwa ni timu ya kuwapa nafasi (Wydad) wafanye wanavyotaka uwanjani, tuliwalazimisha kuwa kwenye presha, lakini vijana wakashindwa kufunga tu.”
Aidha, Ibenge alisema kuwa baada ya kupoteza mechi mbili za kwanza, bado wanataka kutafuta ushindi kwenye mechi nne zilizosalia wakianza dhidi ya Nairobi United ya Kenya wakicheza nao ugenini na nyumbani, kisha Maniema nyumbani na kumalizia kwa Wydad ugenini. Mechi hizo zote zitachezwa kati ya Januari na Februari 2026.
“Tumesalia na michezo minne, hatuwezi kuwa watu wa kukata tamaa, tunakwenda kujiandaa ili tutafute pointi za kwanza kwenye mechi zilizosalia, najivunia wachezaji wangu kwamba wanajua nini timu yao inategemea kutoka hapa.
“Wachezaji wanaimarika sana na kwa hilo ninajivunia, lakini hatujamaliza. Mechi ijayo tutakuwa Kenya, kwa hiyo tunakwenda kujitayarisha, tunakwenda kuwaangalia na kufanya kila liwezekanalo ili kupata pointi.”
Ndani ya kikosi cha Azam, mbali na kocha Ibenge, kuna Feisal Salum, Issa Fofana na Jephte Kitambala ambao wamewahi kucheza hatua ya makundi michuano ya CAF na sasa wanapata nafasi ya kuonyesha uwezo kikosini hapo.
Katika mechi ya juzi, Azam ilicheza vizuri tofauti na ilivyopambana na AS Maniema Novemba 23, 2025. Dhidi ya Wydad, Azam ilikuwa na kasi ya kupandisha mashambulizi lakini tatizo kubwa ni kushindwa kuzitumia tu nafasi kufunga.
Changamoto hiyo imeendelea kuitafuna Azam kwani hata kwenye mechi ya kwanza ugenini dhidi ya Maniema bado ilishindwa kutumia nafasi.
BAO LA KITAMBALA
Kwenye mechi ya jana, Azam ilifunga bao zuri tu, lakini mwamuzi Antoine Essouma kutoka Cameroon alilikataa akidai kabla ya Jephte Kitambala kufunga kulikuwa na madhambi yaliyofanyika, lakini picha za marudio hazikuonyesha madhambi yoyote.
IBENGE MAUMIVU
Azam ilimchukua kocha Mkongomani Florent Ibenge ambaye ana uzoefu wa mashindano ya Afrika, lakini akajikuta anapoteza mechi ya pili mfululizo kwenye makundi.
Matokeo hayo yanamfanya Ibenge kutibua rekodi yake kwani hajawahi kupoteza mara mbili mfululizo kwenye mechi za makundi kabla ya kukutana na hilo akiwa Azam.
Hata hivyo, Ibenge ameonyesha kufahamu kwamba kwa sasa yupo Azam FC ambayo inapata uzoefu akionyesha kuwasifia wachezaji wake kwa namna walivyokimbia kwenye mechi hiyo huku uzoefu mdogo ukiwagharimu.
AZIZ TENA BONGO, MAJANGA
Kiungo wa Wydad, Stephanie Aziz KI alirejea nchini kwa mara ya kwanza kucheza dhidi ya Azam tangu auzwe na Yanga kwa Waarabu hao, lakini bahati mbaya akashindwa kumaliza mechi hiyo vizuri. Safari amerejea akiwa na Wydad.
Aziz KI hakuonyesha kiwango kikubwa sana ndani ya dakika 76 alizocheza hadi alipoumia baada ya kugongana na kiungo wa Azam, Himid Mao na wote kuwahishwa hospitalini.
Inawezekana Aziz KI hakuonyesha kiwango kikubwa kutokana na mbinu za timu hiyo kucheza kwa kuupozesha mchezo, huku ikipunguza kasi ya kushambulia kwa nguvu.
KILIO CHA MASTAA AZAM
Baada ya kumalizika mechi hiyo, baadhi ya wachezaji wa Azam FC walizungumzia namna walivyoumizwa na matokeo hayo, huku wakitaja tatizo la kutotumia nafasi vizuri ndilo lililowaangusha.
Kiungo Feisal Salum ‘Fei Toto’ amesema: “Tumepata nafasi tumeshindwa kuzitumia, wenzetu wamepata moja wameitumia, ni sehemu ya mchezo wa mpira, ipo hivyo. Kushindwa kupata matokeo mazuri sisi kama wachezaji ni jambo baya, tutajiandaa kwa michezo inayokuja ili tufanye vizuri.”
Kwa upande wa winga, Idd Seleman ‘Nado’ amesema: “Matumaini bado yapo, kuna mechi nne zimebaki, tunarudi uwanja wa mazoezi kurekebisha makosa na kuboresha vitu vizuri. Tunaweza kushinda mechi nne zilizobaki na kufuzu robo fainali.”
Mshambuliaji Nassor Saadun, amesema: “Nadhani tatizo kubwa ni umaliziaji, tumecheza vizuri, tumepata nafasi tumeshindwa kuzitumia, tunaamini wakati mwingine tutafanya vizuri.”