Dar es Salaam. Waendesha pikipiki na bajaji nchini wametakiwa kuongeza nidhamu katika utoaji wa huduma ili kuimarisha usalama na utaratibu wa usafiri mijini na vijijini.
Endapo nidhamu haitazingatiwa, kuna uwezekano baadhi ya maeneo ya miji mikuu ikawekewa zuio la kuendesha huduma hizo katikati ya jiji.
Hayo yamebainishwa leo Novemba 29, 2025 na Mkurugenzi Mkuu wa Mamlaka ya Udhibiti Usafiri Ardhini (Latra), Habibu Suluo wakati wa kufunga Maadhimisho ya Kwanza ya Wiki ya Usafirishaji.
Maadhimisho hayo yalianza Novemba 24, 2025 na kufunguliwa na Waziri Mkuu, Dk Mwigulu Nchemba, Novemba 26, 2025, sambamba na Siku ya Usafiri wa Reli Duniani ambayo ni utekelezaji wa azimio namba 77/286 la Umoja wa Mataifa lililopitishwa Mei 16, 2023.
Akizungumza wakati wa kufunga maadhimisho hayo, Suluo amesema mabadiliko katika sekta ya usafirishaji hayawezi kufanikiwa bila kuwepo nidhamu ya watoa huduma, utii wa sheria na ufanyaji kazi kwa kuzingatia taratibu.
“Hawa vijana tunaowaita maofisa usafirishaji lazima wawe na nidhamu, Serikali imerekebisha kanuni za magari ya kukodi, pikipiki na bajaji na imewataka waungane kwenye vyama vya ushirika ili wajisimamie wenyewe na kuboresha huduma,” amesema Suluo.
Amesema vyama hivyo tayari vimeanza kuimarika katika maeneo ya Dar es Salaam, Mwanza, Kigoma, Tabora, Kibaha na Dodoma huku vikitegemewa kuwa nguzo ya ustawi wa uchumi wa vijana.
Katika hatua nyingine, Suluo amesema halmashauri zote nchini zinapaswa kuzingatia wajibu wao wa kupanga, kutenga na kuainisha maeneo rasmi ya vituo vya pikipiki, bajaji na magari ya kukodi ili huduma hizo zifanyike kwa mpangilio.
“Halmashauri zinatakiwa kuweka utaratibu wa vituo, haiwezekani huduma hizi zikafanyika bila mpangilio. Lazima kuwe na maeneo yaliyotengwa rasmi ili wasafirishaji wafanye kazi kwa utaratibu na wananchi wapate huduma bila usumbufu,” amesema.
Amesema kukosekana kwa vituo rasmi kunachangia fujo barabarani, usumbufu kwa watumiaji wa barabara na hatari za usalama, jambo alilosema halipaswi kuendelea.
Akizungumza na Mwananchi kuhusu huo utaratibu, dereva wa daladala ya Mwenge – Mnanzimmoja, Adam Seif amesema bajaji na bodaboda katikati ya mji ni kero na kusababisha foleni kwa sababu ya kuegesha sehemu yoyote.
“Kuna haja halmashauri kuchukua hatua kwetu imekuwa ni kero kwa sababu wanasababisha foleni na ajali zisizokuwa za lazima hali inayochangia kwenye utendaji kazi wa haraka, kucheleweshwa kwa watu kwenye shughuli zao,” amesema Seif.
Kwa upande wake, Mkurugenzi wa Sera na Mipango kutoka Wizara ya Uchukuzi, Maseke Mwita amesema inaendelea kutekeleza mikakati mbalimbali ya kuboresha mfumo wa usafiri nchini, ikiwemo kutoa elimu, kusimamia huduma zilizopo na kubuni miradi mipya ya usafiri wa kisasa katika mikoa na maeneo ya pembezoni.
“Tumeshuhudia changamoto nyingi lakini pia mafanikio ambayo yametupa mwanga wa kuendelea kuchukua hatua mbali mbali. Tutandelea kusimamia elimu, kuboresha usafiri nchini na kusimamia huduma zinazotolewa,” amesema.
Amesema zamani kulikuwa na changamoto ya ukosefu wa takwimu sahihi za safari, lakini sasa Tanzania imetajwa kuwa nchi ya kwanza Afrika na ya tano duniani kwa urefu wa mtandao wa safari. Hivyo Serikali inaona umuhimu wa kuendelea kubuni mikakati mipya itakayowezesha huduma kuwa bora zaidi.