Jumapili Novemba 30, 2025 saa 1:00 usiku, Simba itakuwa Stade du 26 Mars, Bamako nchini Mali kucheza na Stade Malien ikiwa ni mechi ya pili ya hatua ya makundi ya Ligi ya Mabingwa Afrika, huku wawakilishi hao wa Tanzania wakihitaji ushindi ili kuweka hai matumaini ya kufuzu robo fainali.
Simba iliyo kundi D, inaingia katika mechi hiyo ikiwa na kumbukumbu ya kuchapwa bao 1-0, jijini Dar es Salaam na Petro de Luanda ya Angola, huku kwa upande wa Stade Malien, ikitoka suluhu (0-0), ugenini na Esperance de Tunis ya Tunisia.
Msimamo wa kundi hilo unaonyesha Simba inaburuza mkia, juu yake kuna Stade Malien, hivyo ushindi wa Simba kesho utaifanya iwashushe wapinzani wao hao.
Mechi iliyopita ambayo Simba ilifungwa nyumbani, kocha Dimitar Pantev alianza na kikosi ambacho hakikuwa na mshambuliaji halisi, uamuzi ambao ulikosolewa sana ukitajwa kuchangia kipigo hicho, huku mwenyewe akisisitiza ulikuwa mpango wake na hata angerudiana na Petro Atletico leo hii, basi angefanya hivyo tena, akisema tatizo lilikuwa ni nafasi za wazi ambazo wachezaji wake walipoteza.
Katika mechi hiyo, Ellie Mpanzu na Morice Abraham walishindwa kufunga katika lango tupu baada ya kipa wa Atletico kupotea.
Hata hivyo, Pantev amefichua kwamba, kesho ataingia tofauti kwa kumsimamisha mshambuliaji kwani wanakwenda kucheza mechi nyingine na mpinzani tofauti.
“Kesho tutaanza na mshambuliaji mmoja, sio kwa sababu yupo mtu ameomba hili bali tunakwenda kucheza na timu nyingine na tunatakiwa kutumia mbinu nyingine tofauti kidogo,” amesema Pantev ambayo anaiongoza Simba akisaidiana na Seleman Matola.
Katika kikosi cha Simba, washambuliaji wapo watatu, Steven Mukwala ambaye yupo tangu msimu uliopita, wengine ni Seleman Mwalimu na Jonathan Sowah waliotua msimu huu.
Akizungumzia namna ambavyo washambuliaji wanavyojipanga kuisaidia timu, Mukwala amesema: “Mshambuliaji kazi yake ya msingi ni kufunga kwa ajili ya timu kuhakikisha inashinda, unapopoteza nafasi haikufanyi ujihisi sio vizuri bali inakuwa siku mbaya kazini ambapo unapaswa kuwa sawa kiakili kuhakikisha nafasi nyingine haupotezi.
“Wote tunafahamu Simba ni kati ya timu tano bora Afrika, kila mechi timu inatarajia kitu hivyo unapaswa kufanya vizuri kwa ajili ya klabu na sisi tumejipanga kwa hilo.”
REKODI ZINAONGEA
Licha ya Simba kuanza vibaya hatua ya makundi ya Ligi ya Mabingwa Afrika, rekodi zinaonyesha kikosi hicho kimekuwa kikifanya vizuri kinapocheza ugenini kutokana na mechi za hatua ya awali na zile za pili, tofauti na kikicheza nyumbani.
Rekodi zinaonyesha katika mechi mbili ilizocheza ugenini msimu huu za Ligi ya Mabingwa Afrika, Simba imeshinda zote, zilizochangia kikosi hicho kufuzu hatua ya makundi, licha ya nyumbani kushindwa kutamba.
Katika hatua ya kwanza, Simba ilianza kampeni za kusaka tiketi ya makundi kwa kuifunga Gaborone United ya Botswana jumla ya mabao 2-1, baada ya kushinda mechi ya ugenini bao 1-0, huku ya marudiano jijini Dar es Salaam ikatoka sare ya bao 1-1.
Hatua ya pili, Simba ikaendeleza tena rekodi bora baada ya kuitoa Nsingizini Hotspurs ya eSwatini kwa jumla ya mabao 3-0, baada ya kushinda ugenini 3-0, huku marudiano jijini Dar es Salaam, ikatoka 0-0 na kufuzu makundi.
Licha ya rekodi bora kwa Simba ikiwa ugenini, hali hiyo ni sawa na ya wapinzani wao, Stade Malien, ambayo msimu huu katika Ligi ya Mabingwa kuanzia hatua ya awali haijapoteza nyumbani, baada ya kushinda mechi zote mbili ilizocheza.
Malien ilianza hatua ya awali kwa kuitoa AS Tempete Mocaf ya Jamhuri ya Afrika ya Kati kwa jumla ya mabao 7-0, baada ya kushinda nyumbani 2-0, huku ugenini ikashinda tena 5-0 na kukutana na FC Nouadhibou kutoka Mauritania na kuiondosha pia.
Katika mechi hiyo, Malien ilishinda kwa jumla ya mabao 3-1, baada ya kushinda nyumbani 2-0, huku ugenini ikatoka sare ya bao 1-1 na kufuzu hatua ya makundi, jambo linalosubiriwa kuona kama kesho rekodi hiyo itaiendeleza au itavunjwa na Simba.
Hata hivyo, moja ya rekodi bora zaidi kwa Stade Malien, ni kucheza jumla ya mechi 21, za mashindano yote bila kupoteza, tangu mara ya mwisho ilipochapwa bao 1-0, dhidi ya Djoliba AC, katika mechi ya Ligi Kuu ya Mali, Februari 16, 2025.
Katika mechi hizo 21, ilizocheza tangu Februari 16, 2025, Malien imeshinda 16 na kutoka sare tano, ikiwa ni rekodi bora kwa kikosi hicho, jambo linaloashiria Simba itakuwa na kibarua kigumu cha kupindua mtego huo unaoisubiria hapo kesho.