INGAWA nahodha wa timu ya taifa Tanzania, Taifa Stars Mbwana Samatta hajafunga bao lolote akiwa na kikosi cha Le Havre ya Ufaransa katika dakika 518, takwimu zinaonyesha ni mchezaji hatari anapokuwa ndani ya boksi.
Samatta alijiunga na Le Havre Agosti 05 mwaka huu akitokea PAOK inayoshiriki Ligi Kuu ya Ugiriki alipoitumikia misimu miwili akiipa ubingwa wa ligi mara mbili.
Hadi sasa Ligi Kuu ya Ufaransa zikiwa zimechezwa mechi 13, Samatta amecheza jumla ya mechi nane kwa dakika 518, mechi saba akianza na moja akitokea benchi.
Takwimu zinaonyesha amefanya jaribio la mipira 14, ina maana ana nafasi ya kufunga, labda pengine anahitaji muda au msaada wa kiungo mshambuliaji mzuri wa kumsaidia kumalizia pasi.
Uwepo wake eneo la hatari unaonyesha amegusa mipira 31 ndani ya boksi na kuingia kwenye kushinda kupata mpira na anaongeza uwezekano wa hatari kwa timu inaonyesha mchango wake sio tu kwa mabao, bali pia kutengeneza nafasi za hatari ndani ya boksi.
Hata hivyo, bado Samatta ameendelea kuaminiwa katika kikosi hicho na hilo lina maana kocha wa timu hiyo, Didier Digard anaamini uwezo wa nyota huyo aliyewahi kutamba na Aston Villa.
Kuitumikia Ligue 1 ni hatua mpya na ngumu kwa mshambuliaji kama Samatta kutokana na ubora wa safu ya ulinzi ya wapinzani, mbinu na kasi ya ligi inaweza kumchukua muda kuendana na ligi hiyo.